Қорақалпоғистонда ичимлик суви ва оқова хизматлар бўйича янги тарифлар тасдиқланди. Бу ҳақда “Ўзсувтаъминот” матбуот хизмати хабар берди.
Маълум қилинишича, ўтган уч йилда Қорақалпоғистон Республикасида марказлашган ичимлик суви билан таъминланиш даражаси 61,5 фоиздан 70,5 фоизга, канализация қамрови 5,4 фоиздан 5,6 фоизга етказилди. Шунингдек, келгуси 5 йилда марказлашган ичимлик суви билан таъминланиш даражаси 70,5 фоиздан 89,7 фоизга, канализация қамрови эса 5,6 фоиздан 24,6 фоизга етказилиши режалаштирилган.
Бунинг учун барча манбалар ҳисобидан 5,9 триллион сўм эвазига, 3,192 километр ичимлик суви ва 438,6 километр канализация тармоғи, шунингдек, 179 та сув иншооти қуриш ва реконструкция этилиши белгиланган. Бундан ташқари иш ҳақи, электр энергияси, солиқ тўловлари, хорижий кредитлар тўлови амалга оширилган бўлиб, жорий ва капитал таъмирлаш, тизимни модернизация қилиш ишларида ҳам сарф-харажатлар талаб этилади.
Юқоридагилардан келиб чиқиб, Жўқорғи Кенгес томонидан Қорақалпоғистон Республикасида ичимлик суви таъминоти ва оқова сув хизматлари учун янги тарифлар (нархлар) тасдиқланди.
Унга кўра, 2024 йилнинг 15 январидан қуйидаги белгиланган янги тарифлар амалда қўлланади:
Ичимлик суви:
- аҳоли учун 1 метр куб — 2 900 сўм;
- бюджет ташкилотлари учун 1 метр куб — 5 700 сўм;
- улгуржи истеъмолчилар учун 1 метр куб — 5 700 сўм.
Оқова сув хизмати:
- аҳоли учун 1 метр куб — 1 400 сўм;
- бюджет ташкилотлари учун 1 метр куб — 2 800 сўм;
- улгуржи истеъмолчилар учун 1 метр куб — 2 800 сўм.
Бундан аввал Сирдарё, Фарғона, Самарқанд, Хоразм, Андижон, Қашқадарё, Сурхондарё ва Тошкент вилоятида ичимлик суви ва оқова хизматлар бўйича янги тарифлар тасдиқланганди.
Изоҳ (0)