Жаҳон соғлиқни сақлаш ташкилоти (ЖССТ) дунё мамлакатларини 2035 йилгача тамаки, алкоголь ва ширин ичимликларнинг ҳақиқий нархларини камида 50 фоизга кўтаришга даъват этмоқда. Бу ҳақда ташкилот веб-сайтида эълон қилинган баёнотда айтилган.
Фото: Getty Images
“Бугун ЖССТ янги йирик ташаббус билан чиқди. У мамлакатларни сурункали касалликларга қарши курашиш ва давлатнинг ҳаётий муҳим даромадларини таъминлаш мақсадида соғлиқни сақлаш солиқлари орқали 2035 йилгача тамаки, алкоголь ва ширин ичимликларнинг ҳақиқий нархларини камида 50 фоизга оширишга ундамоқда”, дея таъкидланган ҳужжатда.
ЖССТ маълумотларига кўра, тамаки, спиртли ичимликлар ва ширин ичимликларни истеъмол қилиш юқумли бўлмаган касалликлар, хусусан юрак касалликлари, саратон ва қандли диабет эпидемиясини кучайтирмоқда. Бу касалликлар дунёдаги барча ўлимларнинг 75 фоиздан ортиғини ташкил этади.
“Яқинда ўтказилган тадқиқот шуни кўрсатдики, ушбу маҳсулотлар нархини бир марталик 50 фоизга ошириш орқали келгуси 50 йил ичида 50 миллион эрта ўлимнинг олдини олиш мумкин”, дея таъкидлайди ташкилот.
Қўшимча қилинишича, 2012 йилдан 2022 йилгача бўлган даврда 140 га яқин мамлакатда тамакига солиқлар оширилган. Бу эса ҳақиқий нархларнинг ўртача 50 фоиздан кўпроққа кўтарилишига олиб келган.
“Бу кенг кўламли ўзгаришлар амалга ошиши мумкинлигини кўрсатади”, дейилади баёнотда.
Таъкидланишича, Колумбиядан Жанубий Африкагача бўлган турли мамлакатлар ҳукуматлари зарарли маҳсулотларга юқори солиқлар қўйиш орқали уларнинг истеъмолини камайтириш ва бюджет даромадларини ошириш мумкинлигига ишонч ҳосил қилишди. Шунга қарамай, кўплаб мамлакатларда бундай маҳсулотлар, жумладан тамаки маҳсулотлари ишлаб чиқарувчилари учун солиқ имтиёзлари сақланиб қолмоқда. Аҳоли саломатлигини муҳофаза қилиш бўйича миллий мақсадларга эришишга саноат билан тузилган узоқ муддатли инвестиция келишувлари ҳам халақит бериши мумкин, чунки улар тамаки солиқларини оширишга тўсқинлик қилади.
“Жаҳон Соғлиқни Сақлаш Ташкилоти ҳукуматларга тамакига қарши самарали курашиш ва аҳоли саломатлигини ҳимоя қилишни қўллаб-қувватлаш учун бундай имтиёзли режимларни қайта кўриб чиқишни ва келажакда уларни қўлламасликни тавсия этади”, дейилади ҳужжатда.
Бундан аввал Грецияда вояга етмаганларни тамаки сотиб олишга юборганлар жиноий жавобгарликка тортилиши ҳақида хабар берилганди.
Изоҳ (0)