Тошкент шаҳар Юнусобод тумани, Мойқўрғон кўчаси ва Қорақамиш кўчалари кесишмасида катта сув ўтказгич тармоқда носозлик вужудга келгани ҳақида хабар берилганди. ФВВ ҳодиса оқибатлари ҳақида маълумот берди.
Унга кўра, ҳодиса оқибатларини бартараф этиш юзасидан тезкор ишчи гуруҳ тузилган бўлиб, воқеа жойга зудлик билан Фавқулодда вазиятлар вазирлиги ва ФВDT таркибига кирувчи корхона, ташкилотларнинг куч воситалари жалб этилган. Ҳозирги вақтда Тошкент шаҳар “Ўзсувтаъминот” томонидан қувурларда сув босими камайтирилиб, таъмирлаш ишлари олиб борилмоқда.
Ҳолат оқибатида 13 та кўп қаватли уйнинг ертўла қисми ва ички йўлларга сув кириши кузатилган. Ҳодиса натижасида тан жароҳати олган ва ҳалок бўлганлар йўқ.
Вазият тўлиқ назоратга олинган. Яқин соатларда вазият бартараф этилади.
Тошкент шаҳар “Сув таъминоти” ахборот хизмати бошлиғи ҳолат сабабини очиқлади.
Унга кўра, ҳолатга яқин ҳудудда жойлашган қозонхонада вақтинча электр таъминоти узилгани сабаб бўлган. Ҳозирда қисқа вақт ичида аварияни бартараф этиш чоралари кўрилмоқда.
“Яқин ҳудудда жойлашган қозонхонада вақтинча электр таъминоти узилгани сабабли қувурларда босим кўтарилиб кетган ва авария ҳолати юзага келган. Ҳозирда қисқа вақт ичида аварияни бартараф этиш чоралари кўрилмоқда. Мутасадди раҳбарлардан тортиб оддий ишчиларгача барча тик оёқда. Ваҳимага ҳожат йўқ”, — Тошкент шаҳар “Сув таъминоти” ахборот хизмати бошлиғи Равшан Ёқубжонов.
Ҳодиса сабабли, Тикланиш маҳалласи 1, 2, 3, 4, 5, 6 тор кўчалари, Ғиштқўрғон кўчалари, “Астрабод” маҳалласи, Туркистон, “Собиробод” маҳаллаларида, Зенит заводи, Прокуратура академияси, Пиво заводида сув таъминоти вақтинча тўхтатилди.
Шу билан бирга ушбу ҳудудда жойлашган муассаса, корхона ва ташкилотларда ҳам сув бўлмайди.
Сув қувури ёрилиб тошгани натижасида автотранспорт воситаларини ҳаракати вақтинчалик чекланмоқда. Шу муносабат билан, мазкур кўчалардан ҳаракатланувчи 6, 24 ва 142-сонли автобус йўналишларининг қатнов ва оралиқ интервал вақтлари режа асосида ташкил этилишида вақтинча узилишлар кузатилиши мумкин.
Изоҳ (0)