Самарқанд вилоятида ҳам ичимлик суви ва оқова хизматлар бўйича янги тарифлар тасдиқланди

Самарқанд вилоятида ҳам ичимлик суви ва оқова хизматлар бўйича янги тарифлар тасдиқланди. Бу ҳақда “Ўзсувтаъминот” матбуот хизмати хабар берди.

Унга кўра, 2023 йилнинг 16 ноябридан қуйидаги белгиланган тарифлар амалда қўлланилади:

Ичимлик суви:

• аҳоли учун 1 м3 — 2500 сўм;
• бюджет ташкилотлари учун 1 м3 — 5700 сўм;
• улгуржи истеъмолчилар учун 1 м3 — 5 700 сўм.

Оқова сув хизмати учун:

• аҳоли учун 1 м3 — 1600 сўм;
• бюджет ташкилотлари учун 1 м3 — 4200 сўм;
• улгуржи истеъмолчилар учун 1 м3 — 4300 сўм.

Қайд этилишича, келгуси 5 йилда вилоятда марказлашган ичимлик суви билан таъминланиш даражаси 73,1 фоиздан 92,5 фоизга, канализация хизмати қамрови 18,7 фоиздан 45,1 фоизга етказилиши режалаштирилган. Бунинг учун 2,3540 триллион сўм эвазига, 4361,20 минг километр ичимлик суви ва 472,9 километр канализация тармоғи, шунингдек, 432 та сув ва 45 та канализация иншоотлари барпо этилиши белгиланган.

Бундан ташқари иш ҳақи, электр-энергия, солиқ тўловлари, хорижий кредитлар тўлови амалга оширилган бўлиб, жорий ва капитал таъмирлаш, тизимни модернизация қилиш ишларида ҳам сарф-харажатлар талаб этилади.

Шу муносабат билан Халқ депутатлари Самарқанд вилояти кенгаши томонидан 1 ноябрда вилоятда ичимлик суви таъминоти ва оқова сув хизматлари учун янги нархлар тасдиқланди.

Бундан аввал Хоразм, Андижон, Қашқадарё, Сурхондарё ва Тошкент вилоятида ичимлик суви ва оқова хизматлар бўйича янги тарифлар тасдиқланганди.