АҚШнинг Лос Анжелес халқаро аэропортидан ҳавога кўтарилган Boeing 767-400 самолётининг двигатели ёниб кетди. Бу ҳақда ABC7 хабар берди.
Самолётда тўққиз нафар экипаж аъзоси ва 226 нафар йўловчи бўлган. Улар Атлантага йўл олган, бироқ парвоз вақти учоқнинг чап двигателида муаммо юзага келган. Натижада учувчи самолётни ортга қайтаришга мажбур бўлган.
Delta авиакомпаниясининг 446-рейси хавфсиз қўнди. Йўловчилар самолётни одатдаги тартибда тарк этди. Ҳозирда юзага келган муаммо сабабини аниқлаш мақсадида текширув ўтказилмоқда, дейилади Delta авиакомпанияси хабарида.
Йўловчилар режалаштирилган якуний манзилга бошқа самолётда етказилган.
АҚШда баҳор ойларида йўловчи самолёти парвозни тўхтатишга мажбур бўлганди. United Airlines авиакомпаниясига тегишли самолёт двигатели осмонда ёниб кетган. Ҳодиса двигателга қуён кириб кетганидан кейин юз берган. Бунга қадар Техас штатидаги Жорж Буш номидаги аэропортда United Airlines’нинг Airbus А319 самолёти учишга уринган пайтда ёниб кетганди.
Шунингдек, АҚШдаги аэропортда самолёт двигателида муаммо юзага келгач, 200 дан ортиқ йўловчи қор босган учиш-қўниш йўлагига зудлик билан эвакуация қилинганди.
2024 йил баҳорида эса United Airlines’га қарашли бошқа бир самолётнинг двигатели Чикаго аэропортида ёнган. Самолёт йўловчилари эвакуация қилиниб, рейс кечиктирилган.
Изоҳ (0)