Венесуэла президенти Николас Мадуро Салвадор ҳукуматини депортация қилинган венесуэлалик муҳожирларни ноқонуний ушлаб туриш ва қийноққа солишда айблаб Салвадор президенти Найиб Букеле жавобгарликка тортилиши кераклигини билдирди. Мадуро бу ҳақда Каракасда ўтказилган деҳқонлар конгрессида сўзлаган нутқида маълум қилган.
“Миграция жиноят эмас. Аксинча, мигрантларни ўғирлаш ва қийноққа солиш жиноятдир. Букеле шуни билиши керакки, у концентрацион ва қийноқ лагерларида венесуэлаликларга нисбатан қилган барча қилмишлари учун эртами-кечми жавоб беради”, - деди у.
Николас март ойида қўлга олинган ва Салвадорнинг энг йирик қамоқхонаси - террорчиларни сақлаш маркази Секотда “суд ва ҳимоясиз” сақланган 252 нафар венесуэлалик озод қилингани ва аллақачон ватанига учиб кетганини тасдиқлади. У бу одамлар Эл-Салвадорда ҳеч қандай жиноят содир этмагани ва АҚШдан депортация қилинганидан сўнг у ерда қолиб кетгани ҳақидаги фикрларини такрорлаган.
Президентнинг таъкидлашича, озод этилганларнинг дастлабки кўрсатмалари зўравонлик ҳолатларини тасдиқлайди. Улардан бири “калтаклашлар оқибатида буйрагини йўқотган”, бошқалари қийноққа солинган, уларга овқат берилмаган ёки бузилган озиқ-овқат берилган. Унинг сўзларига кўра, барча келганлар қўнишдан сўнг дарҳол венесуэлалик шифокорлар томонидан кўрикдан ўтказилади.
Венесуэла раҳбарининг айтишича, муҳожирларни қайтариш бўйича операция парламент раиси Хорхе Родригес бошчилигидаги АҚШ ҳукумати вакиллари билан олиб борилган музокаралар натижасида амалга оширилган.
Март ойида АҚШ ҳукумати Венесуэланинг “Трен де Арагуа” деб номланувчи жиноий гуруҳига мансуб 238 нафар муҳожирни Салвадорга депортация қилганди. Улар у ердаги машҳур мега қамоқхонага жойлаштирилганди.
Изоҳ (0)