Бугун, 19 июль куни Uzbekistan Airways'нинг Истанбул — Тошкент йўналиши бўйича парвоз вақтида чақалоқ туғилди. Бу ҳақда авиакомпания ахборот хизмати хабар берди.
Маълум қилинишича, парвоз давомида йўловчилардан бирида муддатидан олдин туғуруқ бошланган. Бортдаги икки нафар шифокор экипаж билан ҳамкорликда зарур тиббий ёрдамни тезкорлик билан кўрсатган.
“Экипаж командири қарори билан самолёт Урганч аэропортига фавқулодда қўнди. У ерда она ва янги туғилган ўғил болани шифокорлар кутиб олишди. Оила тезкор тарзда маҳаллий клиникага етказилди”, дейилади манбада.
Компания чақалоққа булутлар орасида бошланган ҳаёт йўли парвоздек енгил ва ёруғ бўлишини тилаган.
Парвоз чоғида рўй берадиган туғуруқ ғайриоддий ва кам учрайдиган ҳодисалардан биридир. Баъзи давлатлар “осмонда туғилган” болага фуқаролик таклиф қилади. Авиакомпаниялар эса турли имтиёзлар, совғалар беради.
Масалан, ҳар йили минглаб чет элликлар АҚШ конституциясининг 14-моддасидан фойдаланган ҳолда Америка орзусида ҳомиладор ҳолда самолётга чиқади. Қонунга кўра, Америка ҳудудида (сув ёки ҳаво) ҳар қандай бола автоматик равишда АҚШ фуқаролигини олади. Америкаликларнинг аксарияти бу қонунни танқид қилса-да, у шу пайтгача ишлаб келмоқда. Шу билан бирга, Канада, Аргентина, Мексика каби давлатларда ҳам бу қонун амал қилиб, фарзанднинг ота-онаси ким бўлишидан қатъи назар, фарзандга ўз фуқаролигини беради.
Қолаверса, дунёда кўплаб авиакомпаниялар бортда дунёга келган чақалоқларга қатор совғалар, айниқса ўз самолётларида маълум масофага учиш ёки бир умрлик бепул парвоз қилиш ҳуқуқини беради.
Жорий йил январь ойида ҳам Uzbekistan Airways самолёти парвози вақтида бортда чақалоқ дунёга келганди. Ҳаво кемаси Тошкентдан Нью Йорк томон учаётган бўлган. Аммо авиакомпания она ва болага соғлиқ тилаш, шунингдек, экипаж аъзолари ва тиббиёт ходимларига миннатдорлик билдириш билан кифояланган. Халқаро тажрибадан келиб чиққан ҳолда, чақалоқларга авиакомпания хизматларидан фойдаланиш ҳуқуқини берувчи “олтин чипта” тақдим этилгани хусусида мутлақо гап-сўз айтилмаган.
Изоҳ (0)