Американинг Chevrolet компанияси Tracker кроссоверининг 2026 йилги янгиланган версиясини ишлаб чиқаришни бошлади. Бу ҳақда General Motors компаниясининг Бразилиядаги бўлими сайтида хабар берилди.
Автомобиль Бразилиянинг Сан-Каэтано-ду-Сул шаҳридаги заводда йиғила бошлади. Яқин орада мамлакат бўйлаб дилерлар орқали сотувга чиқарилади.
Ташқи кўриниш ва дизайндаги янгиликлар
Янги Tracker беш хил комплектацияда таклиф қилинади. Бошқа моделлар қаторида Premier ва RС версиялари премиум тоифага киради.
Янгиланган Tracker икки қаватли олд чироқлар билан жиҳозланган. Юқорида ингичка LED кундузги чироқлар, пастроқда эса асосий фаралар жойлашган. Шунингдек, ихчам туманга қарши чироқлар, янгиланган бампер ва радиатор панжараси Chevrolet’нинг Blazer ва Equinox моделлари услубида безатилган.
Шунингдек, RС спорт версияси сақланиб қолган бўлиб, қора рангдаги ўзига хос безаклар — логотип, ойналар, ғилдираклар ва ўзгача панжара дизайни билан ажралиб туради.
Техник жиҳатлар ўзгаришсиз қолмоқда
Chevrolet компанияси ҳозирча техник хусусиятларни расман эълон қилмаган бўлса-да, улар олдинги версиялардагидек қолиши кутилмоқда:
1.0 Turbo (117/121 от кучи);
1.2 Turbo (139/141 от кучи).
Иккала мотор ҳам бензин ёки этанолда ва 6 босқичли автоматик узатмалар қутиси билан бирга ишлайди. Келажакда Tracker’нинг гибрид версияси ҳам чиқарилиши мумкин.
Автомобилнинг ишлаб чиқарилиши Бразилиядаги заводда йўлга қўйилган. Нархлар 119 900 дан 190 590 реалгача (тахминан 21 500 - 34 000 АҚШ доллари) бўлиши кутилмоқда.
Расмий тақдимот
Tracker 2026 моделининг тўлиқ тақдимоти июль ойида ўтказилиши кутилмоқда. Бу модел Chevrolet’нинг Лотин Америкаси учун янгиланган моделлари орасида биринчи бўлиб намойиш этилади. Йил охиригача Onix, Onix Plus’нинг рестайлинг версиялари ва Хитойда ишлаб чиқарилган электр Spark EUV ҳамда Captiva моделлари ҳам бозорга чиқарилиши режалаштирилган.
Tracker янги моделининг келгусида Марказий Осиё, жумладан, Ўзбекистон бозорида ҳам пайдо бўлиши эҳтимоли юқори.
Изоҳ (0)