Сурия ва Исроил Сувайда вилоятидаги кескинлик фонида ўт очишни тўхтатишга келишди. Бу ҳақда АҚШнинг Туркиядаги элчиси ва Сурия бўйича махсус вакили Том Баррак маълум қилди.
13 июль куни Суриянинг жанубий Сувайда вилоятида друзлар ва суннийларнинг маҳаллий мусулмон бадавий қабилалари ўртасида тўқнашувлар бошланди. Ҳукумат қўшинлари тартибни тиклаш учун вазиятга аралашди, аммо охир-оқибат друзларга қарши бадавийлар томонини олди.
Сурия президенти Аҳмад аш-Шараъа ўн минглаб одамлар ўз уйларини тарк этишга мажбур бўлган жангларни бостириш учун вилоятга яна қўшин киритишини огоҳлантирди.
Исроил друзларни ҳимоя қилиб, ҳукумат кучлари устунларига ўнлаб ҳаво ҳужумлари уюштирди. Шунингдек, Дамашқ марказидаги Сурия Мудофаа вазирлиги қароргоҳи биноларига ҳужум қилди.
Баррак Х ижтимоий тармоғидаги саҳифасида қолдирган хабарида сулҳни эълон қилиб, АҚШ бошчилигидаги тинчлик ташаббусини минтақадаги кўплаб давлатлар қўллаб-қувватлаётганини таъкидлаган.
“Исроил бош вазири Биньямин Нетаньяху ва Сурия президенти Аҳмад аш-Шараъа АҚШ кўмагида, давлат котиби Марко Рубио ёрдамида Туркия, Иордания ва қўшнилар томонидан қўллаб-қувватланаётган ўт очишни тўхтатишга рози бўлди”, деб ёзди Баррак.
Дипломат келишувнинг ҳеч қандай тафсилотларини ошкор қилмаган, бироқ барча томонларни қуролларини ташлаб, тинч қурилишни бошлашга чақирган.
“Биз друзлар, бадавийлар ва суннийларни қуролларини ташлаб, бошқа озчиликлар билан биргаликда қўшнилари билан тинчлик ва фаровонликда янги ва ягона Сурия ўзига хослигини яратишга чақирамиз”, дейди АҚШ вакили.
Сурия маъмурияти Сурияда дарҳол кучга кирадиган умумий тўхтатиш режимини жорий этилганини тасдиқлади.
“Биз барча томонларни, истисносиз ва тўлиқ равишда ушбу қарорга риоя қилишга, ҳарбий операцияларни зудлик билан тўхтатишга, тинч аҳолини ҳимоя қилишни кафолатлашга, инсонпарварлик ёрдамига эркин киришни таъминлашга чақирамиз”, дейилади Сурия президенти девонхонаси баёнотида.
Баёнотда таъкидланишича, агар тинчлик келишуви бузилса, ҳокимият “конституция қоидалари ва ҳуқуқий меъёрларга мувофиқ қонуний чоралар”га кўрилишини билдирди.
Изоҳ (0)