“Калмар ўйини” сериалининг учинчи фасли 27 июнь куни Netflix’да намойиш этилди ва аввалги мавсумларга қараганда янада даҳшатли воқеаларга тўла бўлди. Стресс, хавотир ва зўравонликка тўла бу мавсумда Голливуд актрисаси Кейт Бланшеттнинг чиқиши кутилмаган ҳолат бўлди. Аммо машҳур актриса иштирок этган саҳнада томошабинлар ноодатий бир тафсилотни пайқашди.
Гап шундаки, ўйин бошқарувчиси (Ли Бён Хон) ва ёлловчи аёл (Кейт Бланшетт) билан учрашадиган саҳнада бир хил одамлар икки бор кадрларда кўринади. Дастлаб бошқарувчи етиб келаётганида кулранг свитер ва қора рюкзакдаги эркак, ундан кейин эса кўк жемпер кийган аёл кадрдан ўтиб кетади.
Бироқ айнан ўша саҳнанинг давомида, яъни бошқарувчи қайтиб кетаётган пайтда, худди шу икки одам аввалги йўналишда яна бир бор кўринади.
Бу ҳолат бўйича томошабинлар турлича фикр билдирди: айримлар буни оддий монтаж хатолиги ёки эпизодик актёрлар етишмагани деб ҳисобламоқда. Бошқалар эса бу тафсилот “Калмар ўйини”даги оламнинг даврийлиги, яъни такрорланувчи табиатга эга эканига ишора бўлиши мумкин, деган фикрда.
Маълумот ўрнида: Netflix’нинг машҳур сериали “Калмар ўйини”нинг якуний учинчи мавсуми катта шов-шув билан тақдим этилди. Премьерадан сўнг атиги уч кун ичида янги фасл 60,1 миллион марта томоша қилинди. Бу кўрсаткич уни қисқа муддат ичида энг кўп кўрилган сериалга айлантирди.
Сериалнинг иккинчи мавсуми ҳам ўз вақтида юқори натижаларга эришган — премерадан кейинги дастлабки тўрт кун ичида 68 миллион марта кўрилган ва илк ҳафтасидаёқ рейтингда биринчи ўринга чиққан. Бу натижа ҳатто илгари етакчилик қилган “Уэнздей” сериалидан (50,1 миллион кўриш) ҳам юқори бўлган эди.
Учинчи фасл сюжети бош қаҳрамон Сон Ги Хун атрофида давом этади. У яна шафқатсиз ўйинга аралашишга мажбур бўлади. Бироқ бу сафар унинг мақсади фақат тирик қолиш эмас, балки ўйин тизимига қарши курашиш, қоидаларни ўзгартириш ва инсонийлик ҳали йўқолмаганини исботлаш бўлади.
Изоҳ (0)