Стенфорд университети олимлари асосий аъзоларнинг биологик ёшини баҳолайдиган инновацион қон таҳлилини ишлаб чиқди.
Фалсафа фанлари доктори, неврология ва неврологик фанлар профессори Тони Висс-Корей шундай деди: “Биз қон асосида аъзоларингизнинг ёш кўрсаткичини ишлаб чиқдик. Ушбу кўрсаткич ёрдамида бугун аъзонинг ёшини баҳолашимиз ва ўн йилдан сўнг сизда шу аъзо билан боғлиқ касаллик ривожланиш эҳтимолини башорат қилишимиз мумкин”.
Илмий мақолада таъкидланишича, инсон аъзолари турли тезликда қариши мумкин. Оқсил профилларини ўрганишга асосланган янги таҳлил буйраклар, мушаклар, юрак, ўпка ва бошқа аъзоларнинг хронологик ва биологик ёши ўртасидаги тафовутларни аниқлаш имконини беради. Шунга қарамай, олимларнинг фикрича, умр кўриш давомийлигининг асосий кўрсаткичи мия ёши ҳисобланади.
40 ёшдан 70 ёшгача бўлган 44 мингдан ортиқ кўнгилли иштирок этган 17 йиллик тадқиқот шуни кўрсатдики, “ёш” мия умр кўриш давомийлигини сезиларли даражада оширади ва ўлим хавфини камайтиради. “Кекса” мия эса аксинча, ўлим даражасининг юқорилиги ва Альцгеймер касаллиги хавфи билан боғлиқ
Хусусан, “қари” мия 15 йил ичида ўлим хавфининг икки баравардан кўпроқ ошиши, шунингдек, Альцгеймер касаллиги эҳтимолининг 12 баравар кўпайиши билан боғлиқ эканлиги аниқланди. “Мия узоқ умр кўришнинг дарвозабонидир. Агар миянгиз қари бўлса, вафот этиш эҳтимолингиз юқори бўлади. Агар миянгиз ёш бўлса, эҳтимол, узоқроқ умр кўрасиз”, дея таъкидлади Висс-Корей.
Ушбу тестнинг ишлаб чиқилиши тиббиёт учун янги имкониятлар очмоқда. Висс-Корейнинг айтишича, бу тиббиёт беморларни даволамайди, балки уларнинг мумкин бўлган шикоятлари ва ташхисларини олдиндан башорат қилади, ҳатто дастлабки аломатларнинг олдини олишга қаратилган.
Изоҳ (0)