Помидор бежизга ёзги мавсумнинг энг севимли сабзавотларидан бири ҳисобланмайди. У нафақат мазали таъми, балки соғлиқ учун фойдали хусусиятлари билан ҳам машҳур. Айниқса, ёз кунларида кундалик рационга помидорни қўшиш учун қуйидаги 7 муҳим сабаб мавжуд.
Иммунитетни мустаҳкамлайди
Помидор таркибида кучли антиоксидант — ликопин кўп бўлади. У организмни эркин радикаллардан ҳимоя қилиб, иммун ҳужайраларининг шикастланишини камайтиради ва инфекцияларга қарши туриш қобилиятини оширади. Ҳар куни 1−2 дона ўрта катталикдаги помидор ейиш орқали асосий ҳимоя таъминланади.
Кўриш қобилиятига фойдали
Помидорлар А ва C витаминлари, лютеин ва бета-каротин билан бой бўлиб, улар кўзларни зарарли ултрабинафша нурлардан ва қурилмалар чиқарадиган кўк нурдан ҳимоя қилади. Бу моддаларнинг ёрдами билан кўзнинг чарчаши камаяди, қуриш олди олинади ва ёшга боғлиқ ўзгаришлар — катаракта ёки тўр парданинг дегенерацияси секинлашади.
Юрак саломатлигини қўллаб-қувватлайди
Помидордаги калий, флавоноидлар, толалар, C ва E витаминлари юрак-қон томир тизимига фойда беради. Улар “ёмон” холестерин даражасини пасайтиради, қон томирларини мустаҳкамлайди ва қон босимини нормаллаштиради. Доимий равишда помидор истеъмол қилиш юрак хуружи ва инсульт хавфини камайтиради.
Тери ҳолатини яхшилайди
Ликопин терини қуёш нурларидан табиий тарзда ҳимоя қилади, қуруқликни камайтиради ва унинг тузилмасини яхшилайди. C витамини эса коллаген ишлаб чиқарилишини фаоллаштириб, терининг силлиқлигини, эластиклигини ва табиий ялтирашини оширади.
Овқат ҳазм қилишни яхшилайди
Помидордаги кўп миқдордаги толалар ичак фаолиятини нормаллаштиради, қабзиятни олдини олади ва перисталтикани рағбатлантиради. Помидор таркибидаги табиий кислоталар эса меъда шираси ишлаб чиқарилишини кучайтиради ва овқатни ҳазм қилишни енгиллаштиради.
Саратон касаллиги хавфини камайтиради
Помидорлардаги ликопин ва бошқа антиоксидантлар ҳужайраларни мутациялардан ҳимоя қилиб, айниқса ошқозон-ичак тизими ва простата безидаги ўсмаларни ривожланишини олдини олади. Олимлар фикрича, доимий помидор истеъмоли айрим саратон турларининг хавфини сезиларли даражада камайтиради.
Кайфиятни кўтаради ва хотирани мустаҳкамлайди
Помидорлар холин ва тиамин моддалари билан тўйиниб, асаб тизимига ижобий таъсир кўрсатади. Улар когнитив (ақлий) функцияларни яхшилайди, хотирани мустаҳкамлайди ва безовталикка қарши курашишда ёрдам беради. Айнан шу моддалар таъсирида “бахт гормони” — серотонин фаолроқ ишлаб чиқарилади, бу эса помидорни табиий антидепрессантга айлантиради.
Кунига қанча помидор ейиш мумкин?
Мутахассислар кунига 200–300 грамм (тахминан 2 дона ўртача помидор) истеъмол қилишни тавсия этишади. Уларни хом ҳолда, пиширилган ёки ҳар хил таомлар таркибида ейиш мумкин — ҳаттоки термик ишловдан сўнг ҳам помидор фойдали моддаларни сақлаб қолади, баъзида эса уларнинг миқдори янада ортади. Муҳими, ёғлар билан бирга ейиш (масалан, зайтун мойи ёки пишлоқ билан), чунки бу ликопиннинг организмда яхши сўрилишига ёрдам беради.
Изоҳ (0)