Президент матбуот котибининг хабар беришича, эндиликда ҳар қандай норматив-ҳуқуқий ҳужжат ва лойиҳа Президент Администрацияси ҳузуридаги илмий-таҳлилий институтлар тадқиқотлари, олимлар, маҳаллий ва хорижий экспертларнинг тавсиялари асосида ишлаб чиқилади.
Муҳим йўналишлар лойиҳа офислари орқали амалга оширилади. Администрация фаолиятида “комплаенс” тизими йўлга қўйилади. Бу эса шаффофликни таъминлаш, ижро интизомини мустаҳкамлаш ва коррупция ҳолатларининг олдини олишга хизмат қилади.
Айрим йўналишларда президент вакиллари лавозимлари жорий этилди. Шунингдек, Ахборот ва оммавий коммуникациялар агентлиги (АОКА) фаолияти тугатилиб, унинг асосида Миллий контент ишлаб чиқарувчи марказ ташкил этилмоқда.
Давлат идораларининг жамоатчилик олдидаги ҳисобдорлиги оширилмоқда. Матбуот котиблари институти янада мустаҳкамланади, аҳоли билан коммуникация қилиш ва оммавий ахборот воситалари билан ишлашнинг янги тизими жорий этилмоқда.
АОКА ҳақида
АОКА Президент Администрацияси ҳузурида ташкил этилган ахборот соҳасида ягона давлат органи бўлиб, 2019 йил 2‑февралдаги фармонга асосан ташкил этилган. Шу кундан бошлаб 2020 йилга қадар Комил Алламжонов ушбу тузилманинг биринчи раҳбари сифатида фаолият юритган. 2020 йил июль ойидан бери Асаджон Ходжаев директор лавозимида ишламоқда.
АОКА Ўзбекистонда давлат ҳокимияти органлари, давлат ва хўжалик бошқаруви органлари, республика аҳамиятига молик идора, муассаса ҳамда бошқа ташкилотлар ахборот хизматлари фаолиятини мувофиқлаштиради ҳамда матбуот котибларини аттестациядан ўтказади.
Изоҳ (0)