Stenford universiteti olimlari asosiy a’zolarning biologik yoshini baholaydigan innovatsion qon tahlilini ishlab chiqdi.
Falsafa fanlari doktori, nevrologiya va nevrologik fanlar professori Toni Viss-Korey shunday dedi: “Biz qon asosida a’zolaringizning yosh ko‘rsatkichini ishlab chiqdik. Ushbu ko‘rsatkich yordamida bugun a’zoning yoshini baholashimiz va o‘n yildan so‘ng sizda shu a’zo bilan bog‘liq kasallik rivojlanish ehtimolini bashorat qilishimiz mumkin”.
Ilmiy maqolada ta’kidlanishicha, inson a’zolari turli tezlikda qarishi mumkin. Oqsil profillarini o‘rganishga asoslangan yangi tahlil buyraklar, mushaklar, yurak, o‘pka va boshqa a’zolarning xronologik va biologik yoshi o‘rtasidagi tafovutlarni aniqlash imkonini beradi. Shunga qaramay, olimlarning fikricha, umr ko‘rish davomiyligining asosiy ko‘rsatkichi miya yoshi hisoblanadi.
40 yoshdan 70 yoshgacha bo‘lgan 44 mingdan ortiq ko‘ngilli ishtirok etgan 17 yillik tadqiqot shuni ko‘rsatdiki, “yosh” miya umr ko‘rish davomiyligini sezilarli darajada oshiradi va o‘lim xavfini kamaytiradi. “Keksa” miya esa aksincha, o‘lim darajasining yuqoriligi va Alsgeymer kasalligi xavfi bilan bog‘liq
Xususan, “qari” miya 15 yil ichida o‘lim xavfining ikki baravardan ko‘proq oshishi, shuningdek, Alsgeymer kasalligi ehtimolining 12 baravar ko‘payishi bilan bog‘liq ekanligi aniqlandi. “Miya uzoq umr ko‘rishning darvozabonidir. Agar miyangiz qari bo‘lsa, vafot etish ehtimolingiz yuqori bo‘ladi. Agar miyangiz yosh bo‘lsa, ehtimol, uzoqroq umr ko‘rasiz”, deya ta’kidladi Viss-Korey.
Ushbu testning ishlab chiqilishi tibbiyot uchun yangi imkoniyatlar ochmoqda. Viss-Koreyning aytishicha, bu tibbiyot bemorlarni davolamaydi, balki ularning mumkin bo‘lgan shikoyatlari va tashxislarini oldindan bashorat qiladi, hatto dastlabki alomatlarning oldini olishga qaratilgan.
Izoh (0)