Голливуд актёри Том Ҳолланд ГамесРадар нашрига берган интервьюсида янги “Ўргимчак одам: мутлақ янги кун” фильми ҳақида батафсил маълумот берди. У аввалги фильмларга нисбатан суратга олиш жараёнига қандай ўзгартиришлар киритилишини сўзлаб берди.
Актёрнинг айтишича, COVID-19 пандемияси туфайли ёпиқ павильонларда суратга олинган “Ўргимчак одам: уйга йўл йўқ” фильмидан фарқли равишда, янги қисмда кўплаб саҳналар очиқ ҳавода, шаҳар кўчаларида тасвирга олинади.
“Мен франшизага қайтганимдан ниҳоятда хурсандман. Ўргимчак одам ролини ижро этиш бу эски дўстинг билан яна учрашишдек гўё. Охирги фильмда биз пандемия сабаб анча чекловларга дуч келган эдик. Ҳаммаси махсус ёпиқ майдонларда суратга олинганди. Энди эса биз классик кинотасвирга қайтамиз ва ҳақиқий жойларда ишлаймиз. Шу боис суратга олишни аввало Глазгода бошлаймиз”, дея ўртоқлашди Ҳолланд.
Фильмни суратга олиш ишлари жорий йил август ойида бошланади. Унга Дестин Дениел Креттон режиссёрлик қилади — у илгари “Шанг-Чи” фильми орқали танилган. Фильмда Ҳолланд билан бирга Зендая (МJ) ва Жейкоб Баталон (Нед) қайтади. “Ўргимчак одам: мутлақ янги кун” фильми 2026 йил 31 июлда катта экранларга чиқиши режалаштирилган. Бу Marvel кинематография оламининг олтинчи босқичидаги йирик лойиҳалардан бири бўлади.
Аввалроқ “Ўргимчак одам: уйга йўл йўқ” фильмининг режиссёри Жон Уотц мухлислар томонидан воқеалар ривожи олдиндан тахмин қилиниши сабабли фильмнинг муҳим саҳналаридан бирини ўзгартиргани ҳақида сўзлаб берган эди.
Изоҳ (0)