“O‘rgimchak odam: uyga yo‘l yo‘q” filmining rejissyori Jon Uotts muxlislar tomonidan voqealar rivoji oldindan taxmin qilinishi sababli filmning muhim sahnalaridan birini o‘zgartirgan. Bu haqda u Collider nashriga bergan intervyusida ma’lum qildi.
Gap Tom Holland ijro etgan Piter Parker oldida boshqa olamdan yana ikkita Piter Parker — Tobi Maguayr va Endryu Garfild obrazlari paydo bo‘ladigan mashhur sahna haqida ketmoqda. Ushbu aktyorlar ilgari “O‘rgimchak odam” filmlarida bosh rolni ijro etgan.
Uottsning so‘zlariga ko‘ra, pandemiya davrida hech kim suratga olish maydonini tark eta olmagani sababli syujetning asosiy qismi sir saqlanib qolgan. Biroq Maguayr va Garfildning filmda ishtirok etishi haqidagi mish-mishlar internetga sizib chiqqan, bu esa muxlislar orasida ularning filmda qanday paydo bo‘lishi haqida turli taxminlarga sabab bo‘lgan.
Rejissyorning aytishicha, Maguayr va Garfild ishtirokidagi sahna ssenariyda allaqachon yozilgan edi. Dastlabki reja bo‘yicha, xolasining o‘limidan so‘ng Piter Parker tomda yolg‘iz o‘tirgan holda qayg‘uga cho‘madi, shu vaqtda uning oldida portallar ochilib, undan ikki boshqa O‘rgimchak odamlar chiqib kelardi. Biroq Uotts Reddit’dagi muxlislar postlarini ko‘zdan kechirayotib, ushbu sahnaga juda o‘xshash mashhur fan-artni uchratgan.
“Agar muxlislarimiz aynan shunday syujetni kutayotgan bo‘lsa, biz bunday qila olmaymiz. Bu holatda biz ularga kutilgan hikoyani berishni istamaymiz, deb o‘ylagan edim”, deya eslaydi Uotts.
Rejissyor besh yil avval e’lon qilingan postni nazarda tutgan. Unda ikki O‘rgimchak odam tom ustidagi portal orqali chiqib kelib, Piterga yordam taklif qilgan.
Natijada filmda bu qahramonlar ilk marta Piter Parkerning do‘sti Nedning buvisi yashaydigan uydan paydo bo‘lishdi. Ushbu sahnani suratga olish uchun jamoa ancha sa’y-harakat qilgan: pandemiyaning avj pallasida ular asli aktrisa bo‘lmagan filippinlik ayolni Gavayidan Atlantaga olib kelishgan.
“Bu menga Baster Kitonning bir gapini eslatadi: Menga tomoshabinlar meni yengdim deb o‘ylagani yoqadi. Ammo baribir oxir-oqibat ularni aldab ketaman. Men hikoya aytishda aynan shunday yondashuvni yaxshi ko‘raman: tomoshabin aqlli, u oldindan taxmin qila oladi, janrni biladi, voqealarni tahlil qiladi. Bu esa menga ularni hayratda qoldirish uchun imkon beradi”, deya qo‘shimcha qildi Jon Uotts.
Izoh (0)