Мусиқа соҳасига оид биографик фильмлар томошабинлар орасида энг севимли жанрлардан бири ҳисобланади. Бу турдаги картиналар орқали машҳур инсонларнинг саҳна ортидаги ҳаётига назар ташлаш, карьерасидаги баланд-пастликларни ёки баъзан эса фожиали тарзда якунланувчи ҳаётий кечинмаларни экранда гувоҳи бўлиш мумкин.
Яқин йилларда экранларда таниқли санъаткорларнинг ҳаётига бағишланган бир қатор катта премералар тақдим этилади. Қуйида улардан бир нечтаси ҳақида маълумот берамиз.
Брюс Спрингстин
Америкалик рок афсонаси Брюс Спрингстин ҳақидаги “Deliver Me From Nowhere” фильми 2025 йил кузида намойиш этилиши кутилмоқда. Режиссёр Скотт Купер суратга олаётган ушбу картина санъаткорнинг 1982 йилда яратилган “Небраска” альбоми қандай ёзилгани ҳақида ҳикоя қилади. Ушбу альбом нафақат Спрингстиннинг энг кучли лойиҳаси, балки рок мусиқаси тарихидаги энг юксак асарлардан бири сифатида баҳоланади.
Брюс Спрингстин ҳаёти давомида иккита буюк қўшиқ ёзган. Биринчиси, “Born in the USA”, 1984 йилда Миссисипи шарқини “портлатган”. Иккинчиси ўн йилдан кейин чиққан.
“Битлз” (The Beatles) гуруҳи
Таниқли режиссёр Сем Мендес “Битлз” гуруҳининг ҳар бир аъзоси ҳақида алоҳида фильм суратга олишни режалаштирмоқда. Тўртта фильмда машҳур “Ажойиб тўртлик” аъзоларининг ҳаёти ва ижоди ёритилади. Агар ҳаммаси режа бўйича кетса, бу биопиклар 2028 йилда тақдим этилади.
Фильм тафсилотлари ҳали кўп эмас, чунки лойиҳа ишлаб чиқишнинг дастлабки босқичида. Бироқ Variety нашрига кўра, асосий ролларда қуйидаги актёрлар иштирок этади:
- Пол Маккартни — Пол Мескал
- Ринго Старр — Барри Кеоган
- Жон Леннон — Харрис Дикинсон
- Жорж Ҳаррисон — Жозеф Куинн
Майкл Жексон
Поп мусиқанинг қироли Майкл Жексон ҳақида тўлиқ метражли биографик фильм — “Michael” фильми яқин йилларда катта экранларда намойиш этилади. Фильмни таниқли режиссёр Антуан Фукуа суратга олмоқда. Майкл образини эса унинг жияни — Жаафар Жексон гавдалантиради.
Фильм актёрнинг қайси ҳаётий босқичларни қамраб олиши ҳозирча номаълум, аммо лойиҳага бўлган қизиқиш аллақачон жуда юқори. Айни пайтда қуйидаги актёрлар иштирок этиши маълум:
- Колман Доминго ва Ниа Лонг — Майклнинг ота-онаси Жо ва Кетрин Жексон
- Майлес Теллер — Жексоннинг узоқ йиллик менежери Жон Бранка
Дастлаб премера 2025 йил 3 октябрга режалаштирилган эди, бироқ Deadline хабарига кўра, фильмни икки қисмга бўлиб чиқариш эҳтимоли кўриб чиқилмоқда.
Snoop Dogg
Машҳур рэпер Snoop Dogg ҳақида ҳам тўлиқ биографик фильм суратга олинмоқда. Фильмни Universal Pictures кино компанияси ҳамда Snoop Dogg асос солган Death Row Pictures продюсерлик студияси биргаликда яратади.
Фильм Soop Dogg’нинг ҳип-ҳоп санъатига кириб келиши, 1990 йилларда оммага танилиши, мусиқий ва кинематографик фаолиятидаги муҳим босқичлар, шунингдек, унинг бизнес оламидаги муваффақиятларини ёритиб беради.
Режиссёрликни таниқли киноижодкор Крейг Брюер ўз зиммасига олди. У аввалроқ 2005 йилда суратга олинган “Шовқин ва оқим” (Hustle and Flow) номли фильм орқали танилган. Ушбу драма DJ исмли рэпернинг машҳурликка эришиш йўлини ҳикоя қилади. Фильм “Оскар”нинг “Энг яхши оригинал қўшиқ” (Itʼs Hard Out Here for a Pimp) номинациясида ғолиб бўлган.
Мадонна
Поп мусиқанинг энг машҳур санъаткорларидан бири Мадонна ҳақидаги сериал устида бир неча йилдан бери иш олиб борилмоқда. лойиҳа ҳозирда дастлабки ишлаб чиқиш босқичида. Сериал продюсери сифатида “Идеал жуфтлик”, “Кўринмас нур” сериаллари ҳамда “Асосий қаҳрамон” ва “Дедпул ва Росомаха” фильмлари режиссёри Шон Леви ишламоқда.
Таъкидланишича, минисериал илгари Универсал студияси томонидан суратга олиниши режалаштирилган тўлиқ метражли биографик фильмга алоқадор эмас. Ўша вақтда фильмда поп мусиқанинг қироличаси ролини уч карра “Эмми” мукофоти соҳибаси Жулиа Гарнер ижро этиши кўзда тутилган эди.
Ҳозирча Мадонна карьерасининг айнан қайси даври сериалда ёритилиши номаълум. Шунга қарамай, кўпчилик “Озарк” сериали юлдузи Жулиа Гарнер ушбу сериалда ҳам Мадоннанинг образини гавдалантиришига ишонмоқда. Сабаби, 2023 йилда Гарнер хонанданинг Celebration Tour гастрол концерти доирасида саҳнада у билан бирга кўриниш берган эди. Бу эса актрисанинг ёш Мадонна ролига танланишини қўллаб-қувватлаганини кўрсатади.
Нет Кинг Коул
Актёр ва режиссёр Колман Доминго машҳур афроамерикалик хонанда Нет Кинг Коул ҳақидаги фильм устида ишламоқда. Доминго фильмда бош ролни ўйнабгина қолмай, уни ўзи суратга олади. У 2024 йил январида Variety’нинг подкастида лойиҳа ҳақида илк бор очиқ гапирган эди.
Бундан аввал Доминго хонанданинг 1957 йилдаги Рождество телетомошасига бағишланган Lights Out: Nat King Cole спектаклини саҳналаштирган эди.
Фрэнк Синатра
Режиссёр Мартин Скорсезе томонидан суратга олинадиган Франк Синатра ҳақидаги фильм ҳам энг кутилаётган фильмлардан биридир. Синатра ХХ аср Америка мусиқаси ва поп маданиятининг афсонаси бўлган. Variety’нинг 2024 йилги хабарига кўра, бош ролда Леонардо Ди Каприо, Синатра рафиқаси ролида эса Женнифер Лоуренс суратга тушади. Лойиҳа устида иш бошлаш дастлаб 2024 йилга мўлжалланган эди, бироқ Скорсезенинг бошқа лойиҳалари билан биргаликда бу фильм ҳам вақтинча ортга сурилган.
Изоҳ (0)