“Ўргимчак одам: уйга йўл йўқ” фильмининг режиссёри Жон Уоттс мухлислар томонидан воқеалар ривожи олдиндан тахмин қилиниши сабабли фильмнинг муҳим саҳналаридан бирини ўзгартирган. Бу ҳақда у Collider нашрига берган интервьюсида маълум қилди.
Гап Том Ҳолланд ижро этган Питер Паркер олдида бошқа оламдан яна иккита Питер Паркер — Тоби Магуайр ва Эндрю Гарфилд образлари пайдо бўладиган машҳур саҳна ҳақида кетмоқда. Ушбу актёрлар илгари “Ўргимчак одам” фильмларида бош ролни ижро этган.
Уоттснинг сўзларига кўра, пандемия даврида ҳеч ким суратга олиш майдонини тарк эта олмагани сабабли сюжетнинг асосий қисми сир сақланиб қолган. Бироқ Магуайр ва Гарфилднинг фильмда иштирок этиши ҳақидаги миш-мишлар интернетга сизиб чиққан, бу эса мухлислар орасида уларнинг фильмда қандай пайдо бўлиши ҳақида турли тахминларга сабаб бўлган.
Режиссёрнинг айтишича, Магуайр ва Гарфилд иштирокидаги саҳна сценарийда аллақачон ёзилган эди. Дастлабки режа бўйича, холасининг ўлимидан сўнг Питер Паркер томда ёлғиз ўтирган ҳолда қайғуга чўмади, шу вақтда унинг олдида порталлар очилиб, ундан икки бошқа Ўргимчак одамлар чиқиб келарди. Бироқ Уоттс Redditʼдаги мухлислар постларини кўздан кечираётиб, ушбу саҳнага жуда ўхшаш машҳур фан-артни учратган.
“Агар мухлисларимиз айнан шундай сюжетни кутаётган бўлса, биз бундай қила олмаймиз. Бу ҳолатда биз уларга кутилган ҳикояни беришни истамаймиз, деб ўйлаган эдим”, дея эслайди Уоттс.
Режиссёр беш йил аввал эълон қилинган постни назарда тутган. Унда икки Ўргимчак одам том устидаги портал орқали чиқиб келиб, Питерга ёрдам таклиф қилган.
Натижада фильмда бу қаҳрамонлар илк марта Питер Паркернинг дўсти Неднинг бувиси яшайдиган уйдан пайдо бўлишди. Ушбу саҳнани суратга олиш учун жамоа анча саъй-ҳаракат қилган: пандемиянинг авж палласида улар асли актриса бўлмаган филиппинлик аёлни Гавайидан Атлантага олиб келишган.
“Бу менга Бастер Китоннинг бир гапини эслатади: Менга томошабинлар мени енгдим деб ўйлагани ёқади. Аммо барибир охир-оқибат уларни алдаб кетаман. Мен ҳикоя айтишда айнан шундай ёндашувни яхши кўраман: томошабин ақлли, у олдиндан тахмин қила олади, жанрни билади, воқеаларни таҳлил қилади. Бу эса менга уларни ҳайратда қолдириш учун имкон беради”, дея қўшимча қилди Жон Уоттс.
Изоҳ (0)