Жорий йил 8 июль куни Франция президенти Эммануэл Макрон рафиқаси билан Буюк Британияга уч кунлик давлат ташрифи билан келди. Уларни Уэлс шаҳзодаси Уилям ва Кейт Миддлтон қарши олди.
Расмий учрашувлар, дипломатик тадбирлар ва қироллик маросимларини ўз ичига олган ушбу ташриф ҳали бошланганига кўп бўлмасдан, Брижит Макроннинг Нортхолт ҳарбий базасида кутиб олинган пайтдаги хатти-ҳаракати ижтимоий тармоқларда муҳокама марказига айланди.
Самолётдан биринчи бўлиб чиққан президент Макрон рафиқасига қўл узатди — бу жентлменлик ишораси сифатида баҳоланди. Бироқ Брижит Макрон турмуш ўртоғининг қўлини кўрмасликка олиб, трапдан мустақил равишда тушди. Бу лаҳза камераларга қайд этилди ва дарҳол интернетда тарқалди.
Бу ҳолат, айниқса, май ойида Вьетнамга қилган давлат ташрифи чоғида рўй берган воқеани эслатди. Ўшанда Брижит Макрон, самолёт эшиги режалаштирилганидан бир неча сония олдин очилган пайтда, президентнинг юзига қўл теккизганди — бу ижтимоий тармоқларда “тарсаки” сифатида талқин қилинди. Франция президенти матбуоти бу ҳолатни “оилавий ҳазил” деб атаган бўлса-да, кўпчилик бунга ишонмади.
Лондонда такрорланган бу ҳолат Макронлар оиласида муаммо бор деган тахминларни яна бир бор кучайтирди. Брижитнинг табассуми ҳам бу таассуротни юмшата олмади.
Ижтимоий тармоқларда #BrigitteGate хештеги остида минглаб фойдаланувчилар ўз фикрларини билдиришди: айримлар бу ҳаракатни биринчи хонимнинг мустақил шахс сифатида кўрсатилган позицияси деб баҳолашса, бошқалар уни очиқчасига эрини таҳқирлади, деган фикрларни билдирди.
Шунга қарамай, протокол бўйича кейинги дақиқаларда Макронлар қироллик жуфтлиги билан табассумлар билан саломлашди ва ҳеч қандай расмий этикет бузилиши қайд этилмади. Қизиқарлиси, Брижит Макрон қирол Чарльз III га қўл узатишдан бош тортмади.
Макронлар жуфтлиги Британияга тўрт совға билан келди. Улар орасида энг эътиборлилари:
- Клод Дебюссининг Pelleas ва Melizanda номли ягона якунланган опера ноталари;
- Қирол Чарльз III нинг 50 йилдан буён шуғулланиб келаётган акварел санъатига ишора сифатида Сеннелиэр брендига мансуб махсус бўёқ тўплами;
- Француз Республикаси Гвардиясига тегишли чолғу асбоби;
- Елисей саройи герби туширилган миллий таомлардан тузилган совға савати.
Давлат ташрифи доирасидаги асосий сиёсий воқеалар 9 ва 10 июль кунларига белгиланган. Эммануэл Макрон Буюк Британиянинг янги бош вазири Кеир Стармер билан учрашади.
Изоҳ (0)