Франция президенти Эммануэл Макрон Исроилга қарши сиёсат олиб боришни давом эттирмоқда. Бу ҳақда Исроил ТИВнинг Х ижтимоий тармоғидаги баёнотида маълум қилинган.
“Президент Макроннинг Исроил давлатига қарши кураши давом этмоқда. Макронни ҳақиқат қизиқтирмайди. Ҳеч қандай гуманитар қамал йўқ. Бу очиқдан-очиқ ёлғон”, дейилади вазирлик саҳифасида.
30 май куни Макрон Ғазо секторига тўлиқ ҳажмда гуманитар ёрдам етказиб бериш қайта бошланмаса, Европа Исроилга нисбатан чораларни кучайтириши кераклигини таъкидлаган. Унинг айтишича, Исроилнинг Ғазога инсонпарварлик ёрдамини олиб киришга қўйган тақиқи ҳали тўлиқ бекор қилинмаган, шу сабабли Ғазодаги гуманитар вазият оғирлашмоқда.
Ўз навбатида, Исроил ташқи ишлар вазирлиги бу ҳафта Ғазо секторига 900 га яқин гуманитар ёрдам ортилган юк машинаси киритилганини, яна юзлаб юк машиналари БМТ ходимлари томонидан юкларни текширишни кутаётганини маълум қилди.
Ташқи ишлар вазирлигининг тушунтиришича, Ғазо инсонпарварлик жамғармаси ҳомийлигида гуманитар ёрдам тарқатиш марказлари иш бошлаган бўлиб, бунинг натижасида Ғазо сектори аҳолиси аллақачон икки миллион озиқ-овқат рациони ва ўн минглаб ёрдам тўпламларини олган.
“Аммо Макрон жиҳодчи террорчиларга таъсир ўтказиш ўрнига уларни Фаластин давлати билан тақдирлашни хоҳламоқда. Макроннинг санкцияларга эришиш истаги ҳам бир вақтнинг ўзида бир нечта томондан ҳужумга учраган ва йўқ қилинишга уринилаётган Исроилга қарши қаратилган”, дея таъкидлади Исроил ТИВ.
Axios ахборот агентлиги хабарига кўра, июнь ойида Франция ҳам шундай қарор қабул қилиши мумкин. Президент Эммануэл Макрон апрель ойида France 5 телеканалига берган интервьюсида Фаластинни тан олиш яқин ойлар ичида ҳал қилинадиган масала эканлигини таъкидлаган эди.
Изоҳ (0)