Францияда 55-Париж ҳаво кўргазмаси 16—22 июнь кунлари Париж яқинидаги Le Burje аэродромида бўлиб ўтмоқда. Унда тадбир ташкилотчилари очилишдан олдин Исроил павильонини ёпиб қўйди. Бу ҳақда Anadolu хабар берди.
Айтилишича, тадбир ташкилотчилари “Франция ҳукумати номидан” Исроил мудофаа компаниялари павильонларидан ҳужумкор ва кинетик қуроллари намуналарини олиб ташлашни талаб қилган. Исроил вакиллари эса талабларни бажаришдан бош тортган. Шундан сўнг Исроил павильони ёпиб қўйилган.
Стендларда Elbit Systems, Rafael, IAI ва Uvision компанияларининг авиатехникалари намойишга қўйилган эди. Ускуналар кўрсатилмаган учта кичикроқ Исроил стендлари ва Исроил Мудофаа вазирлиги стенди эса намойиш учун очиқ қолмоқда.
Исроил Мудофаа вазирлиги матбуот котиби Амир Барам ташкилотчиларнинг ҳаракатларини “бир томонлама ва сиёсий мотивацияланган” деб атаган. Исроил мудофаа компанияларига 2024 йилнинг июнь ойида Парижда бўлиб ўтган дунёдаги энг йирик қурол-яроғ кўргазмаси — “Eurosatory 2024”да иштирок этиш тақиқланган эди.
Биринчи марта 1909 йилда ўтказилган ва Франция Аэрокосмик саноат уюшмаси томонидан ташкил этилган шоу Париж шимоли-шарқидаги Le Burje шаҳрида бўлиб ўтади.
Исроилнинг узоқ йиллик иттифоқчиси бўлган Франция аста-секин Ғазодаги ҳаракатлари ва хориждаги ҳарбий зарбалари учун Биньямин Нетаньяху ҳукуматига нисбатан ўз позициясини ўзгартирган. Франция президенти Эммануэл Макрон яҳудий давлатининг Эронга зарбалари муносабати билан “барча томонларни максимал даражада вазмин бўлишга ва кескинликни юмшатишга” чақирган.
Изоҳ (0)