Франция президенти Эммануэл Макрон “Эмили Парижда” сериалини суратга олиш ишлари режиссёрлар режа қилганидек Италияда эмас, балки Францияда бўлиб ўтишига ваъда берди. Бу ҳақда президент Variety нашрига берган интервьюсида айтиб ўтди.
Аввалроқ Netflix томонидан суратга олинаётган лойиҳанинг тўртинчи қисми Римда бўлиб ўтиши маълум бўлган эди. Бундан хабар топган президент фильм режиссёрларига қарата мурожаат қилди:
“Биз режиссёрлардан Парижда қолишларини сўраймиз ва бунга имкон қадар қатъият ва куч билан курашамиз! Римда “Эмили Парижда” фильмини суратга олиш мантиққа тўғри келмайди”, деди Макрон.
Франция президенти интервьюда фильм ҳақида сўзлар экан, Макроннинг рафиқаси тўртинчи мавсумда иштирок этганини ҳам айтиб ўтди:
“Мен рафиқамдан жуда фахрланаман ва Брижит хоним бу лойиҳада қисқа вақтга бўлса ҳам иштирок этганидан мамнунман. У фильмда атиги бир неча дақиқага пайдо бўлади, лекин фикримча, суратга тушиш ишлари рафиқам учун жуда фойдали тажриба бўлди. Қолаверса, бу Франциянинг имижига ижобий таъсир кўрсатади”, деди Макрон.
Variety нашри журналисти Эммануэл Макрондан сериалда нега президентнинг ўзи ҳам иштирок этмагани ҳақидаги саволга президент жавобан: “Мен Брижит каби келишган эмасман”, деди.
The Guardian нашрининг ёзишича, “Эмили Парижда” фильми сабабли мамлакатга кўплаб сайёҳлар жалб қилинмоқда, савдо-сотиқ ривожланмоқда ва Париждаги кўчмас мулкларга бўлган талаблар ортиб бормоқда.
Сериалда бош ролни гавдалантираётган актриса Лили Коллинзнинг айтишича, сёмкага Франция президентининг рафиқасини таклиф қилиш ғояси 2022 йилда муаллиф Даррен Старда пайдо бўлган. Ўшанда улар Макрон билан Елисей саройида учрашган.
Бироқ французлар “Эмили Парижда” сериалининг янги қисмлари суратга олинишига қаршилик билдирмоқда. Пойтахт аҳолисига сюжет бўйича бош қаҳрамон яшайдиган туманга сайёҳлар оқимининг ёпирилиши унчалик ёқмаган. Томошабинларнинг аксарияти лойиҳани Франциянинг стереотип манзарасини кўрсатиб бергани учун фильмни танқид остига олмоқда.
Изоҳ (0)