Елисей саройида Ўзбекистон президенти шарафига қабул маросими бўлиб ўтди (фото)

Франция президенти Эммануэл Макрон Елисей саройида Ўзбекистон президенти Шавкат Мирзиёев шарафига давлат қабул маросимини уюштирди.

Президент матбуот хизматининг маълум қилишича, қабулда икки мамлакат расмий делегациялари, Франция бош вазири Франсуа Байру бошчилигида Вазирлар Маҳкамаси аъзолари, таниқли маданият, санъат ва фан арбоблари, ишбилармон доиралар ва жамоатчилик вакиллари иштирок этди.

Шавкат Мирзиёев Эммануэл Макрон ва унинг рафиқаси Брижит Макронга қабул учун миннатдорлик билдириб, бугун бўлиб ўтган музокаралар тарихий аҳамиятга эга эканини, уларнинг натижасида икки мамлакат ўртасидаги муносабатлар стратегик шериклик даражасига кўтарилганини қайд этди.

Франция етакчиси ўтказилган музокаралар натижаларини ва имзоланган битимларни олқишлади.

“Бир неча йил ичида биз энергетика, сув ресурсларини бошқариш, коммунал хизматлар, транспорт, барқарор туризм каби муҳим соҳаларда узоқ муддатли ҳамкорлик алоқаларини ўрнатишга эришдик. Бунинг далили сифатида Франция ҳукумати ва Франция тараққиёт агентлиги кўмагида француз компаниялари Ўзбекистонга инвестиция киритаётгани, ҳудудларда қўшилган қиймат ва иш ўринлари яратилаётгани, ёшлар касб ўрганиб, ҳаётда ўз ўрнини топаётганини келтиришим мумкин”, деди Эммануэл Макрон.

Эммануэл Макрон қабул маросимидаги нутқини ўзбек тилида якунлади.

“Яшасин Ўзбекистон, яшасин Франция, яшасин Франция—Ўзбекистон дўстлиги”, деди у.

Томонлар халқлар фаровонлиги йўлида Ўзбекистон—Франция ҳамкорлигини янада мустаҳкамлашга қатъий интилишларини билдирди.

Ўзбекистон президенти шарафига қабул маросимидан лавҳалар

Шавкат Мирзиёевнинг Францияга ташрифи ҳақида

Ўзбекистон президенти 11 февраль куни Франция президенти Эммануэл Макроннинг таклифига биноан давлат ташрифи билан Париж шаҳрига келди. 12–март куни Шавкат Мирзиёевни расмий кутиб олиш маросими бўлибди ўтди. Сўнг Елисей саройида Шавкат Мирзиёев ва Эммануэл Макрон музокаралар ўтказди. Унда давлат раҳбарлари икки мамлакат ўртасида стратегик шериклик муносабатларини ўрнатиш тўғрисида тарихий қарорга келди.

Музокаралар якунида президентлар Стратегик шериклик ўрнатиш тўғрисидаги қўшма декларацияни қабул қилди. Давлат раҳбарлари ҳузурида Мутахассислар ва талабалар ҳаракатчанлиги тўғрисидаги ҳукуматлараро битим алмашилди. Шунингдек, бир қатор битимлар имзоланди.