Франциянинг биринчи хоними Брижит Макрон Netflix томонидан суратга олинаётган “Эмили Парижда” сериалининг тўртинчи мавсумида кўриниш беради, деб ёзади The Guardian.
Сериалнинг янги қисмлари 12 сентябрь куни эфирга узатилади.
Қайд этилишича, Макрон лойиҳа муаллифларининг “ҳеч қандай кўрсатмаларисиз”, ўз кийимида суратга тушган.
Сериалда бош ролни гавдалантираётган актриса Лили Коллинзнинг айтишича, сёмкага Франция президентининг рафиқасини таклиф қилиш ғояси 2022 йилда муаллиф Даррен Стар ва унда пайдо бўлган. Ўшанда улар Макрон билан Елисей саройида учрашишган.
“Макрон хоним сериалимизнинг ашаддий мухлисаси ва у биринчи мавсумда ўзи ҳақидаги эслатмамизни юмор билан қабул қилди. Тўртинчи мавсумдаги ушбу саҳна ажойиб, у билан суратга тушиш бир вақтнинг ўзида катта шараф ва ҳақиқий қувончли ҳолатдир”, дейди Коллинз.
Аввалроқ французлар “Эмили Парижда” сериалининг янги қисмлари суратга олинишига қаршилик билдирган эди. Пойтахт аҳолисига сюжет бўйича бош қаҳрамон яшайдиган туманга сайёҳлар оқимининг ёпирилиши унчалик ёқмаган.
Умуман олганда, сериал турлича фикрларга сабаб бўлмоқда. Томошабинларнинг аксарияти лойиҳани Франциянинг стереотип манзарасини кўрсатиб бергани учун танқид остига олишади.
Изоҳ (0)