Америкалик журналист Кендис Оуэнс Франция президенти Эммануэл Макроннинг рафиқаси Брижитнинг эркак жинсида туғилгани ҳақидаги далилларни эълон қилишга ваъда берди.
Хусусан, у ўзининг ижтимоий тармоқларида Брижит Макрон ҳеч қачон мавжуд бўлмаганини исботловчи далилларни тўплаганини даъво қилиб, материалларни 30 январь куни эълон қилишга ваъда бермоқда.
Аввалроқ Оуэнс Макронлар оиласининг адвокатлари уни таъқиб қилаётганини маълум қилган, бироқ “АҚШ Европа эмаслигини, ва у ерда сўз эркинлиги бор”лигини, француз адвокатлари “унинг оғзини ёпа олмаслигини” таъкидлаганди. Унинг сўзларига кўра, “президентлар хорижий журналистларга агар улар ошкор қилиши мумкин бўлган нарсадан даҳшатга тушмасалар таҳдид қилмайди”.
Кейин Хъдаги аккаунтида журналист Макронга мурожаат қилиб, терговни эълон қилишдан олдин унга “адолатли ва мувозанатли интервью” учун 21 та саволдан иборат рўйхатни юборди. Унда у Брижит Макроннинг ўтмиши ҳақида саволлар беради ва унинг ёшлик давридаги фотосуратларини баҳам кўришни сўрайди.
Журналистнинг таъкидлашича, Макрон ўзининг ўқитувчиси 39 ёшли Брижит билан муносабатга киришганида 15 ёшда бўлган, аммо ўқитувчининг мактаб ёки талабалик ҳаётидан ҳеч қандай маълумот мавжуд эмас.
Оуэнс, шунингдек, 2024 йилнинг ноябрь ойида француз журналисти Наташа Рей билан суҳбат ўтказганини маълум қилди, у Брижит Макрон эркак бўлиб туғилганини ва бунинг учун судланганини айтди.
2024 йил сентябрь ойида Париж суди Брижит Макрон эркак бўлиб туғилганини даъво қилган икки аёлни, шу жумладан Рейни туҳмат учун 13,5 минг евро жаримага ҳукм қилди. Кейинчалик кассация суди бу ҳукмни тасдиқлади.
2021 йил декабрь ойида Францияда президентлик сайловларига бир неча ой қолганда, ўзини мустақил журналист деб атовчи Рей YouTube платформасидаги видеода бир неча йилдан буён биринчи хоним ҳақида тергов олиб бораётганини маълум қилди. Унинг таъкидлашича, Макроннинг мактаб ўқитувчиси бўлган ва ундан 24 ёш катта Брижит аслида Жан-Мишел исмли эркак сифатида туғилган. Бу видео тез орада вирусга айланиб, ОАВда, жумладан АҚШда ҳам кенг тарқалди.
2024 йил март ойида Макрон биринчи марта турмуш ўртоғининг жинси ҳақидаги таблоид хабарларини омма олдида танқид қилган эди. Унинг сўзларига кўра, президентлик лавозимида дуч келадиган энг ёмон нарса — бу “ёлғон маълумотлар ва сохта сюжетлар”.
Изоҳ (0)