Joriy yil 8-iyul kuni Fransiya prezidenti Emmanuel Makron rafiqasi bilan Buyuk Britaniyaga uch kunlik davlat tashrifi bilan keldi. Ularni Uels shahzodasi Uilyam va Keyt Middlton qarshi oldi.
Rasmiy uchrashuvlar, diplomatik tadbirlar va qirollik marosimlarini o‘z ichiga olgan ushbu tashrif hali boshlanganiga ko‘p bo‘lmasdan, Brijit Makronning Nortxolt harbiy bazasida kutib olingan paytdagi xatti-harakati ijtimoiy tarmoqlarda muhokama markaziga aylandi.
Samolyotdan birinchi bo‘lib chiqqan prezident Makron rafiqasiga qo‘l uzatdi — bu jentlmenlik ishorasi sifatida baholandi. Biroq Brijit Makron turmush o‘rtog‘ining qo‘lini ko‘rmaslikka olib, trapdan mustaqil ravishda tushdi. Bu lahza kameralarga qayd etildi va darhol internetda tarqaldi.
Bu holat, ayniqsa, may oyida Vyetnamga qilgan davlat tashrifi chog‘ida ro‘y bergan voqeani eslatdi. O‘shanda Brijit Makron, samolyot eshigi rejalashtirilganidan bir necha soniya oldin ochilgan paytda, prezidentning yuziga qo‘l tekkizgandi — bu ijtimoiy tarmoqlarda “tarsaki” sifatida talqin qilindi. Fransiya prezidenti matbuoti bu holatni “oilaviy hazil” deb atagan bo‘lsa-da, ko‘pchilik bunga ishonmadi.
Londonda takrorlangan bu holat Makronlar oilasida muammo bor degan taxminlarni yana bir bor kuchaytirdi. Brijitning tabassumi ham bu taassurotni yumshata olmadi.
Ijtimoiy tarmoqlarda #BrigitteGate xeshtegi ostida minglab foydalanuvchilar o‘z fikrlarini bildirishdi: ayrimlar bu harakatni birinchi xonimning mustaqil shaxs sifatida ko‘rsatilgan pozitsiyasi deb baholashsa, boshqalar uni ochiqchasiga erini tahqirladi, degan fikrlarni bildirdi.
Shunga qaramay, protokol bo‘yicha keyingi daqiqalarda Makronlar qirollik juftligi bilan tabassumlar bilan salomlashdi va hech qanday rasmiy etiket buzilishi qayd etilmadi. Qiziqarlisi, Brijit Makron qirol Charlz III ga qo‘l uzatishdan bosh tortmadi.
Makronlar juftligi Britaniyaga to‘rt sovg‘a bilan keldi. Ular orasida eng e’tiborlilari:
- Klod Debyussining Pelleas va Melizanda nomli yagona yakunlangan opera notalari;
- Qirol Charlz III ning 50 yildan buyon shug‘ullanib kelayotgan akvarel san’atiga ishora sifatida Sennelier brendiga mansub maxsus bo‘yoq to‘plami;
- Fransuz Respublikasi Gvardiyasiga tegishli cholg‘u asbobi;
- Yelisey saroyi gerbi tushirilgan milliy taomlardan tuzilgan sovg‘a savati.
Davlat tashrifi doirasidagi asosiy siyosiy voqealar 9 va 10-iyul kunlariga belgilangan. Emmanuel Makron Buyuk Britaniyaning yangi bosh vaziri Keir Starmer bilan uchrashadi.
Izoh (0)