Сурхондарё вилоятида йирик ҳажмли насос қувурининг ёрилиши ва сув тошиши оқибатида хонадонларга зарар етгани ҳақида хабарлар тарқалди. Вилоят ҳокимлиги ҳолат юзасидан маълумот берди.
Унга кўра, 30 июнь куни соат 12:50 ларда Жарқўрғон туманида жойлашган “Боботоғ” насос станциясининг 1-коллектори 7-участкасида диаметри Д-2850 мм бўлган қувурда ёрилиш ҳолати юзага келган. Натижада юқори босимли сув отилиши кузатилган.
Авария юзасидан зудлик билан дастлабки чоралар кўрилган: 1-коллектордаги 3 та насос агрегати фаолияти фавқулодда тўхтатилган. Шундан сўнг махсус тезкор бригада ҳодиса жойига етказилиб, таъмирлаш ишлари олиб борилган. Соат 21:00 да таъмирлаш ишлари тўлиқ якунланган ва 21:20 да насос агрегатлари қайта ишга туширилган.
Юзага келган ҳолат оқибатида яқин атрофдаги аҳоли хонадонлари ҳамда насос станцияси иншоотларига ҳеч қандай зиён етмаган. Ҳозирги вақтда насос агрегатлари одатдаги иш тартибида ишламоқда.
- Тошкентнинг Юнусобод туманидаги Мойқўрғон ва Қорақамиш кўчалари кесишмаси остидан ўтган 800 диаметрли магистрал сув қувури тешилиб, атрофни сув босгани ҳақида хабар берилган эди.
- “Ўзсувтаъминот” АЖ раҳбарияти иштирокида ўтказилган матбуот анжуманида Юнусободдаги қувур ёрилиши оқибатида қанча ичимлик суви йўқотилгани маълум қилинган.
Изоҳ (0)