Британия қироллик хонадони 30 июнь куни ўз молиявий ҳисоботини эълон қилиб, ҳукуматдан йиллик 118,50 миллион доллар маблағ олишини маълум қилди. Бу ҳақда CNN хабар берди.
“Суверен грант” деб аталадиган сумма қироллик саройларини сақлаш ва қироллик оиласининг расмий мажбурият тўловларини қоплайди. Мазкур маблағ Британия солиқ тизими орқали таъминланади. Бунинг эвазига монарх 1760 йилдан бери давом этиб келаётган келишувга асосан, Аскот пойга майдонини, Англия, Уэлс ва Шимолий Ирландия атрофидаги Crown Estate мулкидан олинган барча даромадларни ҳукуматга топширади.
Crown Estate — Британия монархига корпорация асоси сифатида тегишли бўлган ерлар ва мулклар тўплами.
“Суверен грант” — бу монарх ва қироллик оиласи вакилларининг харажатларини қоплаш учун ажратиладиган маблағдир. Хусусан, маблағ уларнинг жамоат вазифалари, жумладан саёҳат ва тарихий мулкларни сақлаш харажатларини қоплайди. Аммо хавфсизликни молиялаштириш истисно этилади.
“Қироллик оиласи аъзолари Буюк Британия ва хорижда 1900 дан ортиқ оммавий тадбирлар ўтказган. Расмий қироллик саройларида эса 828 та тадбирда 93 мингдан ортиқ меҳмон иштирок этган”, дейилади ҳисоботда.
118,50 миллион доллар бўлган умумий маблағдан 71,1 миллиони асосий грант ҳисобланади. Букингем саройини таъмирлашни молиялаштиришга 47,4 миллион доллардан йўналтирилади.
Лондон марказида энг диққатга сазовор сайёҳлик маскани бўлган Букингем саройида йирик модернизация амалга оширилмоқда. Электр кабеллари, қувур линиялари, лифтлар ва ҳаммомлар янгиланмоқда. Шунингдек, қироллик уйи барқарор авиация ёқилғисидан фойдаланишни кўпайтиради. Қироллик хонадони 2024 йили “деярли тўлиқ электр автомобиллардан фойдаланишга ўтишни мақсад қилганди”.
Монархиянинг 3 та асосий даромад манбаи “Суверен грант”, Ланкастер ва Корнуэл герцоглиги ерлари ҳамда уларнинг шахсий мулки ва инвестициялари ҳисобланади.
Изоҳ (0)