Хитой суди Хунан вилояти Хитой Халқ сиёсий маслаҳат кенгаши қўмитаси раисининг собиқ ўринбосари Дай Даожинни порахўрлик учун ўлим жазосига ҳукм қилди. Бу ҳақда Хитой марказий телевидениеси хабар берди.
Ма`лум қилинишича, 24 июнь куни Гуандун вилояти Чжухай шаҳрининг ўрта бўғин халқ судида Хунан вилояти ХХСМК қўмитаси раисининг собиқ ўринбосари Дай Даожин иши бўйича ҳукм эълон қилинган.
“Айбланувчи Дай Даожин порахўрлик учун ўлим жазосига ҳукм қилинди. Жазонинг ижроси икки йилга кечиктирилди. Сиёсий ҳуқуқлардан умрбод маҳрум этилди ва барча шахсий мол-мулки мусодара қилинди”, дейилади телеканал хабарида.
Бундан ташқари, амалдорнинг ноқонуний йўл билан қўлга киритган мол-мулки ва ундан олинган даромадлар давлат хазинасига топширилиши, етишмовчилик бўлган тақдирда эса қўшимча ундирилиб олиниши белгиланган.
Таъкидланишича, у турли лавозимлардаги хизмат мавқеидан ғаразли мақсадларда фойдаланиб, тўғридан-тўғри ёки қариндошлари орқали жами 107 миллион юандан (тахминан 14,9 миллион доллар) ортиқ молиявий ва моддий бойликларни ноқонуний равишда қабул қилган. Истеъфога чиққандан сўнг, Дай Даожин ўзининг аввалги алоқаларидан фойдаланиб, яна 3,66 миллион юан (тахминан 510 минг доллар) миқдоридаги қимматбаҳо буюмларни ноқонуний равишда қўлга киритган.
ХХРда коррупцияга оид жиноятлар бўйича суд томонидан ўлим жазоси тайинланиб, унинг ижроси икки йилга кечиктирилиши камдан-кам учрайдиган ҳолат эмас. Икки йиллик муддат тугагандан сўнг ўлим жазоси жазони енгиллаштириш ёки муддатидан олдин озод қилиш имкониятисиз умрбод қамоқ жазосига алмаштирилиши мумкин.
2024 йилнинг ноябрь ойида Дунёнинг энг йирик банкларидан бири — Банк оф Чина собиқ бошқаруви раиси ва партия қўмитаси котиби Лю Лянже порахўрликда айбланиб, ўлим жазосига ҳукм қилинганди.
Изоҳ (0)