Мали ва Россия ўзаро савдони кенгайтириш ва иқтисодий алоқаларни мустаҳкамлашга қаратилган бир қатор шартномаларни имзолади. Бу ҳақда BBC хабар берди.
Шартномалар атом энергетикаси соҳасида янада кўпроқ ҳамкорлик қилишни кўзда тутади. Ушбу келишувлар ҳақида Мали хунтаси раҳбари полковник Ассими Кол Гойтанинг Москвага ташрифи чоғида эълон қилинган. Россия президенти Владимир Путин билан 2 соатлик музокаралар олиб борилган.
Гойта 2021 йилда ҳокимиятни қўлга киритганидан бери Россия билан муносабатларни яхшилаган. Шу билан бирга собиқ мустамлакачи Франция билан алоқаларни қисқартирган. Қўшни Буркина Фасо ва Нигер ҳам Россия билан алоқаларни мустаҳкамлашга ҳаракат қилмоқда.
Путин Мали билан савдо алоқалари “камтарона” бўлса-да, ўсиш тенденцияси борлигини ва келажакдаги ҳамкорлик йўналишлари геология-қидирув, энергетика, логистика ва гуманитар соҳада бўлишини билдирган. Олдинроқ Россия Мали учун стратегик энергетика лойиҳаси сифатида руслар томонидан ишлаб чиқилган атом электр станциясини қуришни муҳокама қилган эди.
“Ушбу расмий ташриф ўзаро ишонч ва суверенитетни ҳурмат қилиш руҳида муносабатларимизни янада чуқурлаштиришга ёрдам беради”, деди Кол Гойта.
Ҳарбий ҳамкорлик Россия—Мали иттифоқининг асосий элементи бўлиб қолмоқда. Россия ёлланма қўшинлари Кол Гойта ҳукуматини кўп йиллик аксилинқилобий операциялардан сўнг Франция ва БМТ қўшинлари чиқариб юборилганидан бери қўллаб-қувватлаб келмоқда.
“Вагнер” гуруҳи яқинда мамлакатни тарк этган, аммо яна бир куч — Африка корпуси ҳудудда қолмоқда. Армия Малида ҳокимиятни қўлга олганида, давлат тўнтаришига асосий сабаб сифатида хавфсизлик билан боғлиқ вазиятнинг ёмонлашувини тўхтатиш зарурлигини кўрсатганди. Бироқ можарони ҳал қилиш ваъдаларига қарамай, сўнгги йилларда зўравонлик кучайиб бормоқда.
Изоҳ (0)