Хитой молия секторида коррупцияга қарши янги кенг кўламли текширувлар ўтказилмоқда, деб хабар берди Financial Times. Февраль ойидан бери ўндан ортиқ соҳа раҳбарлари тергов марказига чақирилган ёки жазоланган.
Энг шов-шувли иш Bank of China собиқ раиси Лиу Лянгега тегишли. Март ойи охирида Хитой Коммунистик партиясининг тартиб-интизомни текшириш бўйича марказий комиссияси (CCDI) Лянге “интизом ва қонунчиликни жиддий бузганликда” гумонланаётганини маълум қилди, аммо тафсилотларни келтирмади.
Хитой саноат ва тижорат банкининг топ-менежери Конг Лин ҳам тергов остига тушган. Илгари у China Renaissance инвестиция банки ташкилотида ишлаган. Банк раҳбари ва асосий эгаси Бао Фан эса февраль ойининг ўрталаридан бери алоқага чиқмаяпти. FT маълумотларига кўра, у катта эҳтимол билан ҳибсда.
Апрель ойида CCDI China Everbright Group собиқ раиси Ли Xиaoпенгни “қонунни жиддий бузганликда” гумон қилди. Бу ойда Хитой Экспорт-импорт банкининг Шанхай филиали раҳбари ҳам 14 миллион доллар пора олганликда айбланди. Январь ойида Хитойнинг етакчи суғурта компанияси Сhina Life Insurance раҳбари Ван Бин коррупцияда айбланган эди. Текширувлар Шанхай олтин биржасини ҳам четлаб ўтмади.
Март ойининг охирида CCDI 30 дан ортиқ йирик давлат компанияларини текширувдан ўтказиши ҳақида эълон қилганди. Улар орасида China Investment Corp., Суверен бойлик жамғармаси, Хитой тараққиёт банки, Хитой қишлоқ хўжалиги банки ва бошқалар бор. Бу воқеалар Си Цзиньпин (тарихда илк бор) учинчи муддатга Хитой раҳбари этиб сайланганидан кейин содир бўлмоқда, дея қайд этди CNN. FT маълумотларига кўра, Си октябрь ойида партия таркибий ислоҳотларни чуқурлаштиришга ва “ҳамма турдаги молиявий фаолиятни тартибга солиш билан шуғулланишига” ваъда берган.
Bloomberg манбаларининг айтишича, Хитой ҳукумати банк соҳаси вакилларини текширувлар “ҳали тугалланмагани” ҳақида огоҳлантирган.
Изоҳ (0)