Турк ижодкорлари томошабинларни янги ва ёрқин лойиҳалар билан қувонтириш учун кун-у тун ижод билан банд. Баъзи фильм ва сериаллар дарҳол эътиборни жалб қилади, бошқалари эса улар орасида йўқолиб кетиши мумкин.
“Фақат сен” (2014)
Бош ролларда: Иброҳим Челиккол, Белчим Билгин, Керем Жан ва бошқалар
Бир вақтлар Али умидли боксчи эди. Аммо қамоқхонада ўтириб чиққач, автомобиль тўхташ жойида қоровуллик қилади ва сув етказиб бериш билан шуғулланади. Тақдир тақозоси билан у Ҳазал исмли ёш, кўзи ожиз қизга дуч келади. Фожиадан сўнг Ҳазал кўриш қобилиятини деярли йўқотган, фақат озгина ёруғликни илғай олади, холос. Ҳазал ва Али турли дунёларга мансуб бўлсалар-да, айнан бир-бирларида ўзларига керак бўлган қўллаб-қувватлашни топади. Бироқ ҳаётларининг энг бахтли дамларида бош қаҳрамонлар қизнинг кўрлиги тез кучайиб бораётганини ва унинг ҳаёти қил устида турганини билиб қолишади.
“Эфлатун” (2022)
Бош ролларда: Керем Бурсин, Ирем Ҳелважиолу, Мелиса Акман ва бошқалар
Офлаз ташқи кўринишдан ҳаётда ҳамма нарсага эга бўлган ёш йигит. У оилавий бизнес меросхўри, унаштирилган қизи бор ва яқин орада оила қуриши керак. Бироқ Офлаз ўзини ёлғиз ва бахтсиз ҳис қилади, фотосуратчи бўлишни орзу қилади. Бир куни у устахонага отасининг соатини олиб боради ва у ерда Эфлатун исмли кўзи ожиз қиз билан танишиб қолади. Эфлатун соат таъмирлаш устаси бўлиб ишлайди. Икки ёлғиз қалбнинг тасодифий учрашувидан сўнг, улар ўз ҳаётларига бошқача назар ташлашади.
“Қайта бирлашиш” (2019)
Бош ролларда: Қодир Доғулу, Деврим Ўзкан, Меҳмет Ўзгур ва бошқалар.
Солиҳ омади чопган антиквар. У ноёб буюмларнинг сеҳрли хусусиятларини кўра олади ва у бундай буюмларнинг ҳақиқий эгасини топишга ёрдам беради. Азиз эса ғайритабиий нарсаларга ишонмайдиган муваффақиятли, хавфли ва совуққон бизнесмен. Бир куни Фарида Солиҳ берган соатни Азизга олиб келгач, эркакнинг ҳаёти тубдан ўзгара бошлайди. Дастлаб у атрофида содир бўлаётган ғалати ҳодисаларга эътибор бермасликка уринади, бироқ вақт ўтиши билан уларни эътиборсиз қолдира олмайди. Бунинг устига, Азиз нима учун хаёли фақат ўзининг ғалати тасаввурлари эмас, балки Фарида ҳақида ҳам банд бўлганини тушунолмайди.
“Мен билан қол” (2018)
Бош ролларда: Чағлар Эртуғрул, Мерич Арал, Мурат Айген ва бошқалар.
Амир оддий тадбиркор эмас, балки ҳақиқий меҳнатсевар. Унинг яхши иши, ҳашаматли уйи ва қиммат машинаси бор-у, аммо шахсий ҳаёти йўқ. Амир гўёки бутун дунёдан ўзини девор билан тўсиб олган, ҳеч кимни яқинига йўлатмайди. Аслида, атрофдагилардан узоқлашиб, бутунлай ишга шўнғиб кетган бу одам шунчаки отасининг вафотидан кейин қолган оғриқни енгишга уринмоқда. Зайнаб билан тасодифан танишув уни ўз ҳаётига бошқача назар ташлашга мажбур этади. Хушчақчақ, дилкаш ва қувноқ қиз гўё Амирда ҳаётга иштиёқ уйғотади, бироқ айни пайтда у ўз сирини ҳар қандай йўл билан яширишга уринади.
“Чаён” (2020)
Бош ролларда: Эврим Алася, Берил Позам, Юсуф Чим ва бошқалар.
Кўп йиллар олдин Перихан ўзининг кичкина қизини эри билан қолдириб, янги ҳаёт бошлаган. У бадавлат одамга турмушга чиқиб, яна бир қизалоқ — Бернани дунёга келтиради ва уни меҳр-муҳаббат билан тарбиялайди. Биринчи фарзандининг тақдири билан ҳеч қачон қизиқмаган, уни шунчаки золим отасининг қарамоғига топшириб қўйган эди. Йиллар ўтиб, отасига ташлаб кетилган Ферда Мерве исмли қизни дунёга келтиради ва кичик сартарошхона очади. Бироқ аёлни онасига бўлган ранжиш ва унинг хиёнатидан қолган алам қийнайди. Ферда кичик синглисининг эри бўлган тадбиркор Фикрет билан учраша бошлайди. 40 йилдан сўнг Перихан яна биринчи қизи билан учрашади, аммо бу учрашув даҳшатли оқибатларга олиб келади.
Изоҳ (0)