“Манчестер Юнайтед” тарбияланувчиси, англиялик футболчи Маркус Рэшфорд “Барселона”га ижара асосида ўтишга яқин турибди. Barca Universal нашри журналисти Мигел Риконинг хабар беришича, томонлар 2026 йил июнгача мўлжалланган шартнома бўйича келишувга эришган.
Унга кўра, “Барселона” футболчи ижарага олади. Шунингдек, битимга кейинчалик тўлиқ харид қилиш банди ҳам киритилади. Бироқ агар каталонияликлар бу бандни фаоллаштирмаса, улар “Манчестер Юнайтед”га 5 миллион евро миқдорида компенсация тўлаши керак бўлади.
Маълум бўлишича, Рэшфорд янги клубда ўйнаш имкониятини қўлга киритиш учун маошининг 30 фоизга қисқаришига рози бўлган. Шунга қарамай, у ҳар йили тахминан 14 миллион евро ишлаб олади. Тўлиқ трансфер амалга оширилган тақдирда, “Барселона” футболчини 30–35 миллион евро атрофидаги суммага сотиб олади.
Эслатиб ўтамиз, Маркус Рэшфорд — “Манчестер Юнайтед” академиясининг тарбияланувчиси. У ўтган мавсумнинг иккинчи ярмида “Астон Вилла” сафида ижарада ўйнаган. Унинг манкунианликлар билан шартномаси 2028 йил ёзига қадар амал қилади. Transfermarkt портали Рэшфорднинг қийматини 50 миллион еврога баҳоламоқда.
Изоҳ (0)