Турк сериалларининг кўплаб мухлислари севимли фильмларини томоша қилишга вақт тополмасликларидан тез-тез шикоят қилишади. Бундай ҳолатларда қисқа турдизи лойиҳалари ёрдамга келади. Уларнинг баъзиларини бир кечада бемалол кўриб чиқиш мумкин.
“Севги 101” (2020)
Эда, Усмон, Синан ва Керем — мактаб қоидаларига бутунлай зид хулқ-атворга эга муаммоли ўқувчилар. Директор ва аксарият ўқувчилар уларга қарши, фақатгина устоз Буржу бу болаларни қўллаб-қувватлаб, уларга ёрдам беришга ҳаракат қилади. Кутилмаганда муаммоли ўқувчилар севимли ўқитувчиси бошқа ишга ўтказилишини билиб қолишади. Эда ва унинг дўстлари учун бу фақат бир нарсани англатади — Буржу кетгандан сўнг, уларни мактабдан четлатишади. Бироқ ўсмирлар, агар ўқитувчиси оила қурса, қаерда ишлашни давом эттиришни ўзи танлаши мумкинлигини билиб олишади. Шунда улар Буржуни жисмоний тарбия ўқитувчиси билан учраштиришга қарор қилишади. Муаммо шундаки, Буржунинг аллақачон севгилиси бор, болалар эса ўз режаларини амалга ошириш учун аълочи Ишикнинг ёрдамига муҳтож бўлишади.
“Дунё ва мен”
Толга ва Илкин анчадан бери муносабатда бўлиб, идеал жуфтликдек кўринади. Улар ёш, гўзал, бадавлат ва нима исташларини аниқ билишади. Бироқ уларнинг муносабатларида анчадан бери илиқлик йўқолган. Толга ҳозирги лойиҳаси ҳақида ўйлаверганидан севгилисига эътибор бермай қўйган. Илкин муносабатларидаги оловни қайта ёқиш учун қўлидан келганча ҳаракат қилади, аммо натижа бўлмайди. Шунда қиз ижтимоий тармоқларда сохта профил яратиб, бегона ном билан Толга билан ёзиша бошлайди. Виртуал мулоқот шунчалик чуқурлашадики, энди Илкин Толга олдида ўша аёл ролини ўйнай оладиган қизни топиши керак.
“Дилемма” (2024)
Неслиҳан Турхан машҳур телебошловчи бўлиб, ўз дастурида энг хавфли жиноятларни фош этади. У ҳар бир жиноятчи жазосини олиши кераклигига қаттиқ ишонади. Охирги эфирда у ҳатто ўз ўғли айбдор бўлганда ҳам уни аямаслигини айтади. Неслиҳан бу сўзлари башоратга айланишини хаёлига ҳам келтирмаган эди. Кўп ўтмай, унинг ягона ўғли Жан бир қизнинг ўлимида асосий гумондорга айланади. Энди бутун мамлакат телебошловчини диққат билан кузатиб, бу вазиятдан қандай чиқишини тахмин қилишга уринмоқда: ўз тамойилларига содиқ қолиб, жиноятчини қамоққа тиқиш учун барча чораларни кўрадими ёки оналик туйғусига бўйсуниб, ўғлини ҳар қандай йўл билан ҳимоя қиладими.
“Эртанги кун келмайдигандек” (2024)
Ҳакан сиёсий тадқиқотларга ихтисослашган машҳур ва муваффақиятли журналист. Кутилмаганда, таҳририят уни тез-тез шов-шувларга сабаб бўладиган ёш, муваффақиятли актриса Манола билан суҳбат ўтказиш учун юборади. Ҳаканга бу янги топшириқ мутлақо ёқмайди, бироқ ундан бош тортишнинг иложи йўқ. Манола ўзи билан суҳбатлашадиган журналист ҳақида эшитган. Ҳикоянинг ҳар иккала қаҳрамони ҳам бир-бирига шубҳа билан қарайди. Аммо Ҳаканнинг овозидаги кибрни сезган актриса у билан хавфли ўйин ўйнашга аҳд қилади.
“Сўроқ” (2024)
Метин Язижи — Жиҳан Новоғлу билан ҳамкорликда ишлайдиган тажрибали терговчи. Кутилмаганда аёлнинг отаси вафот этади ва унинг қизлари, шу жумладан Живаннинг ўзи ҳам гумон остига олинади. Болаликда у ва сингиллари уйдаги даҳшатли зўравонликка бардош беришга мажбур бўлганлари сабабли оталарининг ўлими улар учун айрилиқ эмасди. Метин бу ишни текширишга киришади ва марҳумнинг меросхўрларидан бири айбдор эканлигига ишонч ҳосил қилади.
“Бозор”
Кенан Акıн — жуда шуҳратпараст ва муваффақиятли актёр бўлиб, у ўзининг ёлғизлиги ва қўрқувларини ичкилик билан енгишга одатланган. Унинг онаси — машҳур руҳшунос нафақат ўғлига ёрдам бера олмайди, балки унинг муаммоларини янада оғирлаштиради. Бир куни суратга олиш майдонида Кенан фильмдаги ҳамкасби деб ўйлаб, ҳижобли қизни ўпиб қўяди. Бироқ у қаттиқ адашганди. Муневвер - тасодифан бу ерга келиб қолган эди. Уни деярли мажбуран турмушга беришган ва даҳшатли никоҳдан қутулиш учун у марҳума онасининг дугонасидан ёрдам сўрашга келганди. Тасодифий учрашув катта жанжалга айланиб, бу воқеадаги барча қаҳрамонлар учун бутунлай янги ҳаётнинг бошланишига сабаб бўлади.
“Ўқитувчи” (2020)
Акиф мактабда ўқитувчилик қилади. Ҳамкасблари уни ҳурмат қилишса-да, ўқувчилари уни жуда бўшанг одам деб ҳисоблашади. Ҳеч ким содда ўқитувчи бутун бир синфни гаровга олишга қодир эканлигини тасаввур ҳам қила олмасди. Бироқ Акиф бундай кескин қарорга бежиз келмайди. Мактабдаги энг аълочи ўқувчилардан бирининг ўз жонига қасд қилгани унга тинчлик бермасди. Бу қиз ноҳақ равишда допинг қабул қилганликда айбланиб, ўзини ўлдирганди. Ўқитувчи кимлардир қизни шафқатсизларча масхаралаб, ҳаётдан воз кечишга мажбур қилган, деб ҳисоблайди. Ўқувчиларни гаровга олиб, у содир бўлган воқеа қандай бўлганини билишга қарор қилди.
Изоҳ (0)