Деярли 60 йил аввал ишдан чиққаан NASA сунъий йўлдоши кутилмаганда радиосигнал юборди. Бу ҳақда arXiv препринтлар платформасида эълон қилинган тадқиқотда маълум қилинган.
Маълум қилинишича, 2024 йил 13 июнь куни австралиялик тадқиқотчилар осмонда ғайриоддий нурланишни қайд этган. У 30 наносекунддан камроқ давом этди. Таҳлиллар шуни кўрсатдики, унинг манбаи чуқур космосда эмас, балки орбитада жойлашган эди. Жойлашувига кўра, сигнал Relay 2 сунъий йўлдошидан келаётган эди.
Материалда айтилишича, 2024 йилнинг ёзида аниқланган сирли радиосигнал Австралиянинг Кертин университети астрономларини ҳайратга солган. Портлаш яқин майдоннинг вақтинчалик кечикишларини таҳлил қилиш орқали аниқланиб, унинг манбаи узоқ вақтдан бери ишлатилмаётган Америка Қўшма Штатларининг Relay 2 сунъий йўлдоши эканлиги маълум бўлган.
Relay-1 ва Relay-2 қурилмалари экспериментал алоқа йўлдошлари ҳисобланади. Relay 1 1962 йилда ишга туширилган ва АҚШдан Европа ва Японияга телевизион кўрсатувларни узатишни бошлаган биринчи сунъий йўлдош бўлган. Илк кўрсатув Жон Кеннедининг ўлдирилиши ҳақидаги хабар эди.
Relay-2 1964 йилда ишга туширилган. Бироқ 1965 йил сентябрь ойида у ўз фаолиятини тўхтатган. Унинг ретрансляторлари 1967 йилда, иккита транспондеридан охиргиси ишдан чиққанда бутунлай ўчирилган.
Ўшандан бери сунъий йўлдош яқин вақтларгача ҳеч қандай фаоллик кўрсатмаган. Олимлар сигналнинг пайдо бўлиши ҳақида бир нечта тахминларни илгари сурган.
Биринчи тахминга кўра, сунъий йўлдош электростатик кучланишни тўплаган ва охир-оқибат разряд чиқарган. Бошқа бир тушунтириш микрометеорит билан боғлиқ. Космик жинс зарраси бирор нарса билан тўқнашганда, зарба пайтида плазма булутини ҳосил қилиши мумкин.
Австралиялик олимларнинг фикрича, “ўлик” сунъий йўлдош космик чиқиндилар билан тўқнашув ёки электростатик разряд туфайли сигнал юборган.
“Биз янги пулсар ёки бошқа бир жисмни топдик, деб ўйлаб, жуда ҳаяжонландик. Бироқ таҳлил давомида унинг манбаи коинотда сузиб юрган Relay 2 экани тасдиқланди”, дейди астроном Кленси Жеймс.
Изоҳ (0)