Киев осмонида 19 апрель куни кечқурун “ҳаво объектининг ёрқин нурланиши кузатилди”, деб хабар бермоқда Meduza Киев шаҳар ҳарбий маъмурияти раҳбари Сергей Попкога таяниб.
Осмондаги чақнаш маҳаллий вақт билан соат 22:00 (Тошкент вақти билан 00:00) атрофида кузатилган. Киевда ҳаво ҳужуми тўғрисида огоҳлантириш эълон қилинди, бироқ “ҳаво ҳужумидан мудофаа тизими ишга тушмади”, деди Попко.
“Дастлабки маълумотларга кўра, бу ҳодиса NASA космик сунъий йўлдошининг Ерга қулаши натижаси бўлган”, — қўшимча қилди Киев расмий вакили.
Украина космик агентлиги қошидаги махсус назорат бош маркази соат 21:57 да “юқори энергияли акустик ҳодиса” қайд этилганини билдирди. “Портлаш эпимарказининг тахминий жойлашуви Киев вилоятида. Ҳодиса космик жисм атмосферанинг зич қатламларига киргани билан боғлиқ бўлиши мумкин, маълумотлар аниқланмоқда”, — деди марказ.
Ўз навбатида, Украина Қуролли кучлари Ҳарбий-ҳаво кучлари қўмондонлиги Киев осмонидаги чақнашлар “сунъий йўлдош/метеорит қулаши билан боғлиқ”лигини таъкидлади. Қўмондонлик Россия Украинага Киев йўналишида “авиаҳужум воситалари” билан таҳдид қилмаётганини таъкидлади.
Шу ҳафта бошида NASA фойдаланишдан чиқарилган 300 килограммли RHESSI космик аппарати 19 апрелда орбитадан чиқишини эълон қилган эди, деб ёзади BBC News. NASA матбуот котиби Роберт Маргеттанинг айтишича, Киевда чақнашлар кузатилган пайтда RHESSI аппарати ҳали орбитада бўлган.
Изоҳ (0)