Миллиардер Илон Маскнинг SpaceX компанияси сентябрь ойида сайёҳларни космосга олиб чиқиши пайтида фавқулодда вазият кузатилди. Камида бир соат давомида Ердан бошқариш имконияти йўқолди. Бу ҳақда Reuters хабар берди.
Маълум қилинишича, Калифорниядаги SpaceX объектида электр таъминоти узилгани сабабли Ер билан алоқа йўқолган. SpaceXнинг беш кунлик Polaris Dawn миссияси давомида хусусий астронавтлар, жумладан, миллиардер ва Маскнинг узоқ йиллик ҳамкори Жаред Айзекман космосга чиққанди. АҚШнинг сайланган президенти Дональд Трамп уни NASA бошлиғи лавозимига номзод сифатида кўрсатган.
Космик сайёҳларга кўра, электр таъминоти узилиши туфайли SpaceX компанияси Dragon космик кемасини орбитада қисқа муддат давомида бошқара олмаган. Айзекман ва SpaceX’нинг яна уч астронавти хавфсиз ҳолатда қолиб, компаниянинг Starlink сунъий йўлдош тармоғи орқали Ер билан маълум даражада алоқани сақлаб турган.
Ушбу ҳодиса NASA ҳамда Маск ва Айзекман вакиллари бўлган хусусий космик компаниялар ўртасидаги рақобат масаласини яна ҳам кескинлаштирди. Улар Трампнинг келажакдаги маъмуриятида масъулиятли лавозимларни эгаллашга тайёргарлик кўрмоқда, дейилади хабарда.
Ўзларига таклиф этилаётган вазифаларда Айзекман NASA’ни бошқариши, Маск эса самарадорлик бўйича ҳукумат комиссиясига раҳбарлик қилиши кўзда тутилган. Ҳар иккала шахс ҳам SpaceX ва бошқа хусусий космик операторлар билан ҳамкорлик қилувчи ва уларни тартибга солувчи агентликларга сезиларли таъсир кўрсатиши мумкин.
Изоҳ (0)