Қуёшда 15 июнга ўтар кечаси М қувватли чақнаш содир бўлди.
Амалий геофизика институтининг қайд этишича, чақнаш 18 дақиқа давом этган. Ушбу Қуёш чақнаши Ер учун хавфли эмас, аммо бу июнь ойидаги энг кучлиси ҳисобланади. Институтга кўра, яқин 2 кун ичида шунга ўхшаш куч синфидаги яна бир нечта чақнашлар кутилмоқда.
Қуёш чақнашлари нурланиш қуввати бўйича А дан (энг кучсиз) Х гача (ўта кучли) бўлади. Чақнаш натижасида юзага келадиган магнит бўронлари энергия тизимлари, навигация ускуналари ва радиоалоқа ишларига таъсир қилиши мумкин. Об-ҳавога таъсирчан одамлар одатда бундай пайтларда ўзини ёмон ҳис қилади.
25 май куни Қуёшда энг юқори фаоллик синфидаги фавқулодда кучли чақнаш содир бўлгани ҳақида хабар берилган эди.
Олдинроқ НАСА иштирокида Европа космик агентлиги (ЕКА) томонидан яратилган Солар Orbitэр космик кемаси Қуёш жанубий қутбининг тарихдаги дастлабки суратларини олгани ҳақида маълумот берилган эди. ЕКА матбуот хизмати ушбу тасвирларни юлдузни ўрганишда янги даврнинг бошланиши деб баҳолаган.
Кема Қуёшнинг фотосфераси, магнит майдони ва тожини батафсил суратга олишга муваффақ бўлган. Бунинг учун учта поляриметрик ва гелиосейсмик шакллантиргич (PHI), кучли ултрабинафша нурланиш шакллантиргичи (EUI) ва тож муҳити учун спектрал шакллантиргич (SPICE) каби махсус асбоблардан фойдаланилган.
Тўпланган маълумотлар олимларга Қуёшнинг ташқи қатламларидаги модда ҳаракатини, шунингдек, илгари номаълум бўлган ҳодисаларни, жумладан, қутб газ уюрмаларини чуқурроқ ўрганиш имконини берган. Қўшимча қилинишича, октябрь ойида агентлик зонднинг юлдузнинг шимолий қутбидан жанубий қутбига ўтиши ҳақида батафсил ҳисобот эълон қилишни режалаштирмоқда.
Изоҳ (0)