НАСА иштирокида Европа космик агентлиги (ЕКА) томонидан яратилган Solar Orbiter космик кемаси Қуёш жанубий қутбининг тарихдаги дастлабки суратларини олди. ЕКА матбуот хизмати ушбу тасвирларни юлдузни ўрганишда янги даврнинг бошланиши деб баҳолаган.
“Бугун биз инсоният тарихида биринчи марта Қуёшнинг жанубий қутби тасвирини тақдим этмоқдамиз. У бизнинг энг яқин юлдузимиз, ҳаёт манбаи ва замонавий космик ҳамда ердаги энергия тизимларининг потенциал вайронкоридир. Шунинг учун унинг қандай ишлашини тушунишимиз ва хатти-ҳаракатларини башорат қилишни ўрганишимиз ғоят муҳимдир”, дейди ЕКА фан бўйича директори Керол Манделл.
Кема Қуёшнинг фотосфераси, магнит майдони ва тожини батафсил суратга олишга муваффақ бўлган. Бунинг учун учта поляриметрик ва гелиосейсмик шакллантиргич (PHI), кучли ултрабинафша нурланиш шакллантиргичи (EUI) ва тож муҳити учун спектрал шакллантиргич (SPICE) каби махсус асбоблардан фойдаланилган.
Тўпланган маълумотлар олимларга Қуёшнинг ташқи қатламларидаги модда ҳаракатини, шунингдек, илгари номаълум бўлган ҳодисаларни, жумладан қутб газ уюрмаларини чуқурроқ ўрганиш имконини беради.
Қўшимча қилинишича, октябрь ойида агентлик зонднинг юлдузнинг шимолий қутбидан жанубий қутбига ўтиши ҳақида батафсил ҳисобот эълон қилишни режалаштирмоқда.
Илгари Миллий қуёш обсерваторияси (АҚШ) тадқиқотчилари Қуёш тожи — Қуёш атмосферасининг ташқи қатламини ўрганиш учун янги технологияни қўллаган эдилар. Бунинг учун улар атмосфера бузилишларини бартараф этадиган замонавий ер телескопларининг мослашувчан оптикасидан фойдаланди. Бу космик жисмларнинг аниқроқ тасвирларини олиш имконини берди. Олимлар учун тожнинг нима учун унинг остидаги фотосферага қараганда иссиқроқ экани ҳамон жумбоқ бўлиб қолмоқда. Айнан шу ҳудудда Ерга етиб келгач, қутб ёғдуси ва геомагнит бўронларини келтириб чиқарадиган тож масса чиқиндилари содир бўлади.
Изоҳ (0)