АҚШ шу йилнинг ёзида айғоқчи сунъий йўлдошлар туркумини учиради, улар орбитадаги объектларни ўчириб қўйиши ёки шикастлаши мумкин бўлган Хитой ва Россия космик кемаларини кузатади. Бу ҳақда Bloomberg АҚШ Космик кучларига таяниб хабар берди.
Сунъий йўлдош тармоғига Silent Barker номи берилган. Улар Ердан тахминан 22 минг миля (35,4 минг км) баландликда жойлаштирилиши тахмин қилинмоқда. Космик кучлар “таҳдидларни ўз вақтида аниқлаш” ҳамда “орбитада душман сунъий йўлдошларини кузатиш”га мўлжалланган сунъий йўлдошларни яратиш устида АҚШ Миллий космик разведка агентлиги билан ҳамкорликда ишлаган.
Boeing ва Lockheed Martin компанияларига тегишли United Launch Alliance компанияси июль ойидан кейин Atlas V ракета-ташувчисини сунъий йўлдошлари билан бирга коинотга учиради, аниқ сана ҳали эълон қилинмаган.
Миллий космик разведка агентлиги директорининг йиллик таҳдидлар ҳисоботида айтилишича, Хитойда АҚШ ва бошқа иттифоқчилар сунъий йўлдошларини уришга қодир қуроллар мавжуд. Мисол сифатида улар Хитойнинг SJ-21 ва Shijian-17 сунъий йўлдошларини келтирди. Идоранинг маълум қилишича, Хитой Халқ озодлик армияси келажакда “контркосмик операциялар” ўтказишни режалаштирган.
Эслатиб ўтамиз, Россия ва Хитойдан келаётган потенциал таҳдидларнинг кучайиши фонида Пентагон АҚШ Космик кучларини коинотда ушбу давлатлар билан эҳтимолий тайёрлашни бошлаган.
АҚШ Космик кучларининг вазифаси нима?
АҚШ Космик кучлари 2019 йилда ташкил этилган ва мамлакат Қуролли кучлари таркибидаги олтинчи мустақил тузилма бўлиб, унга дастлаб ҳаво кучлари зиммасига юкланган вазифалар юкланган, дея эслатади журналистлар. USSF’нинг асосий вазифалари АҚШнинг коинотдаги манфаатларини режалаштириш ва ҳимоя қилиш, шунингдек, эҳтимолий таҳдидларга эътибор қаратган ҳолда барча бўлинмаларни жиҳозлашдир.
Идора ходимларининг вазифалари ракеталарни учириш, сунъий йўлдошлар, ердаги алоқа ва сенсор ускуналарини бошқаришни ўз ичига олади. Бугунги кунда АҚШ космик кучларининг ҳарбий хизматчилари сони 16 мингга яқин кишини ташкил этади.
АҚШ, Хитой ва Россия — БМТнинг Коинотдан тинч мақсадларда, жумладан, илмий фаолият учун фойдаланиш бўйича қўмитаси аъзолари. Ҳар учала давлат ҳам коинотда муҳим ҳарбий ресурсларга эга.