Шифокор Салвадор Пласенсия “Дўстлар” сериали юлдузи Меттю Перрига унинг фожиали ўлимидан аввал бир неча ҳафта давомида кетамин моддасини бериб келганини судда тан олди. Бу ҳақда The New York Times хабар берди.
Агар шифокор айбдор деб топилса, у 40 йилгача озодликдан маҳрум қилиниши ва 2 миллион АҚШ доллари миқдорда жаримага тортилиши мумкин. Тергов ҳаракатларига кўра, у бир неча маротаба актёрнинг уйига бориб, наркотикни тўғридан тўғри ўзи юборган. Шунингдек, улар жамоат автотураргоҳида ҳам учрашиб турган ва Пласенсия машина орқа ўриндиғида Меттюга катта дозадаги гиёҳванд моддани юборган.
Перрининг иши юзасидан жами беш кишига айблов эълон қилинган, уларнинг тўрт нафари айбини тан олган. Прокуратура версиясига рози бўлмаган ягона шахс — “кетамин қироличаси” лақаби билан танилган наркодилер Жасвин Сангхадир.
54 ёшли актёр 2023 йил 28 октябрда кетаминнинг ортиқча дозаси оқибатида вафот этган. Кетамин — кучли таъсир қилувчи дори воситаси бўлиб, оғриқ қолдириш ва депрессия касалликларини даволашда қабул қилинади. Препарат шифокор томонидан буюрилади. Уни қўллаш Америка озиқ-овқат ва фармацевтика идораси томонидан тасдиқланган.
Актёр ҳақидаги ҳужжатли фильмда айтилишича, ўлимидан уч кун олдин Перрига шифокор белгиланган миқдордан 27 марта кўпроқ кетамин дозасини берган. Бу эса унинг тўсатдан вафот этишига сабаб бўлган.
Изоҳ (0)