Энг ноодатий фобияларга эга жаҳон юлдузлари ҳақида маълумот берамиз.
Меттью Макконаҳи
“Далласлик харидорлар клуби”, “Интерстеллер” ва бошқа фильмлар юлдузи Меттью Макконаҳи туннел ва айланадиган эшиклардан қўрқади.
“Бир марта айланувчи эшиклардан қўрқишимни айтганимда ҳамма устимдан кулганди. Ҳақиқатан ҳам бу кулгили. Болалигимда шундай эшикка қисилиб қолганман, шунинг учун ҳам қўрқаман. Иложи бўлса ҳар доим оддий эшиклардан фойдаланаман”.
Актёр туннелларни ҳам ёқтирмайди. “Бундай жойларда бир-икки метрдан нарини кўра олмайсиз. Олдингизда нима бўлаётганини ёки у ерда бахтсиз ҳодиса юз берганлигини ҳеч қачон билмайсиз”, — дейди у.
Опра Уинфри
Телебошловчи сақич чайнамайди, ходимларига ҳам буни тақиқлайди. Бир марта Опранинг меҳмонларидан бири ликопчага сақич ёпиштирган пайти ҳам бўлган. Телебошловчи меҳмонга нима дегани маълум эмас-у, лекин у ўша ликопчани ташлаб юборган.
Унда сақичга нисбатан бундай нафрат қаердан пайдо бўлган? Уинфри кичкиналигида бувиси сақич чайнагани, кейин эса уларни шкаф, диван, стол ва стулларга ёпиштириб қўйганини кўрган. Бу нарса Опранинг руҳиятида ўз изини қолдиради.
Рианна
Рианнада иҳтиёфобия (балиқдан қўрқиш) бор. Қўшиқчи болалигида Барбадос оролида яшаганида шу қўрқув пайдо бўлган — у денгизда сузганида бармоқлари орасидан майда балиқ сирғалиб ўтади, бу эса унда жирканиш ва ваҳима уйғотади. Қўшиқчи балиқни фақат пиширилган ҳолда яхши кўради.
Кристен Стюарт
“Сумерки” юлдузи Кристен Стюарт отлардан қўрқади. У ҳам Рианна каби болалигида мазкур қўрқувни орттириб олган. Ўшанда ота-онаси қизини от спорти мактабига юборади ва дарсларнинг бирида от актрисани улоқтириб юборади.
“Бир куни отдан йиқилиб, қаттиқ шикастландим. Тўққиз ёшимда тирсагимни синдириб олганман”. Ўшандан бошлаб Стюарт ҳаммага унда гиппофобия борлигини, унга психолог ва тинчлантирувчи воситалар ёрдам беришини айтади.
Чак Норрис
Актёр спиртли ичимликлардан қўрқади. Уларнинг ҳидини ёмон кўради, спиртли ичимлик ичмайди ва барларга ҳам бормайди. Бунга отаси автосалондаги ишидан сўнг уйга келиб, шу тарзда “чарчоғини чиқаргани” ва доим жанжал кўтаргани сабаб бўлган. Шу сабабли ота-онаси ажрашади ва Норриснинг ҳаёти анча яхшиланади. Аммо у ҳали ҳам алкоголли ичимликлар ва маст одамлардан узоқроқ юради.
Меган Фокс
Юлдуз қўлини қоғоз кесиб олишидан қўрқиб, қоғозларга яқинлашмайди. Ҳатто сценарийни ўқиш, хатларни очиш ёки болаларининг дафтарларини ҳам текширолмайди. Аммо у бунинг ечимини топган. Меганга хат ёки дафтарларни варақлаш учун ёрдамчиси ёки болалари ёрдам беради, лекин у сценарийни ламинатланган шаклда келгандан кейингина ўқийди.
Адель
Машҳур қўшиқчи қушлардан, аниқроғи, чағалайлардан қўрқади. Хонанда уларни жуда хунук, ифлос ва ҳаракатларини олдиндан айтиб бўлмайдиган мавжудотлар деб билади. Адель қушлардан бири унинг қўлидан музқаймоғини тортиб олганида жуда қўрқиб кетган.
“Ўшанда тўққиз ёшда эдим. Мен хотиржам сайр қилиб юрардим. Шунда бир чағалай музқаймоғимни тортиб олди. Ростини айтсам, у мени ҳам ўзи билан олиб кетади, деб ўйлагандим”— дейди актриса.
Камерон Диас
Диас эшик тутқичларидан қўрқади — аслида актриса уларда тўпланиб қолган жуда кўп миқдордаги микроблардан чўчийди. Машҳурнинг таъкидлашича, у жамоат жойларида эшик тутқичларини ушлашдан эҳтиёт бўлади.
Бундай пайтларда у бошқа бировдан эшикни очишни сўрайди ёки дастани салфетка билан ушлайди. Актриса, шунингдек, микроблардан қутулиш учун қўлини тез-тез ювиб туради.
Кайли Миноуг
Маълум бўлишича, австралиялик эстрада хонандаси Кайли Миноуг кийим илгичларни ёқтирмайди. Гап шундаки, у бир-бирига ёки шкафга тегадиган илгич овозини ёмон кўради:
“Лондондаги уйимда барча нарсаларим жавонларга қўйилган махсус хонам бор. Илгичлар йўқ”, — дейди у.
Изоҳ (0)