“Дўстлар” сериалидаги Чендлер Бинг образи билан танилган америкалик актёр Мэттью Перрининг ҳашаматли уйи сотувга қўйилди. Марҳум актёр хонадонни ўлимидан уч ой аввал харид қилган.
Голливуд тепаликларида жойлашган кўчмас мулк умумий майдони 900 квадрат метрни ташкил қилади. Унда учта ётоқхона ва тўртта ҳаммом мавжуд. 54 ёшли актёр мазкур уйда яшашга улгурмаган. Перри ўтган йилнинг октябрь ойи охирида бахтсиз ҳодиса туфайли вафот этди. Унинг ўлимига кетамин дори воситасининг ножўя таъсири сабаб бўлган.
Мэттью Перри ҳашаматли уйларни яхши кўрар ва ўзига ёққан мулкларни сотиб оларди. Актёр ўзининг биринчи уйини 1994 йилда “Дўстлар” сериалининг премьерасидан бир йил ўтгач харид қилди. У муваффақиятли ситком юлдузлари сериалнинг биринчи мавсумидан кейин доим янги хонадон сотиб олади, деб ҳазиллашган эди.
Ўлимидан аввал Мэттью Перри молиявий муаммоларга дуч келмаган бўлса-да, тўсатдан кўчмас мулкларини сотувга қўйганди.
Актёр “Шошсанг — кулгига қоласан”, “Уч кишилик танго”, “Фирибгарлар” каби фильмларда ҳам суратга тушган. 2022 йилда Перри ўзининг “Дўстларим, яқинларим ва яна бир жуда ёмон нарса” номли автобиографик китобини нашр этган, унда гиёҳвандлик билан курашган йиллари тасвирланган.
Фото: Entertainment Weekly
Изоҳ (0)