“Дўстлар” сериали орқали таниш бўлган америкалик актёр Мэттью Перрининг ўлими бўйича бешта гумондор, жумладан, марҳумнинг шахсий ёрдамчиси Кеннет Ивамасу ва икки шифокорга нисбатан айблов эълон қилинди, деб ёзмоқда “Правила жизни”.
54 ёшли Перрининг ўлим сабаби бахтсиз ҳодиса деб аталган эди. У 2023 йил 28 октябрь куни Лос Анжелесдаги уйининг ваннахонасида ўлик ҳолда топилган. Актёрнинг жасадида қотиллик аломатлари бўлмаган эди. Ўлим сабаби сифатида “кетамин моддасининг ножўя таъсири” ва “чўкиш” каби омиллар келтирилган эди.
Аниқланишича, актёр вафот этган кунда эрталаб у Ивамасудан бир нечта кетамин инеъкциясини олган. Актёр депрессияни даволаш учун кетамин қабул қилар, аммо кун сайин дори дозасини ошириб борарди. Мутахассислар унга буюрган дозадан ортиғи ўлимга олиб келишини айтиб огоҳлантирган эди.
Аммо Перри кўпроқ инеъкция қабул қилишни истади ва шахсий шифокоридан рад жавобини эшитгач, қўшимча дори қабул қилиш учун бошқа шифокорларга мурожаат қилди.
АҚШ прокурори Мартин Эстраданинг сўзларига кўра, икки шифокор Перрининг кетаминга қарамлигидан фойдаланиб, актёр ҳаётининг сўнгги ойларида унга дори воситасини “ўта хавфли дозаларда” сотган.
“Шифокорлар қилаётган ишлари нотўғри эканини билишарди. Уларнинг хатти-ҳаракатлари жаноб Перрининг ҳаётини катта хавф остига қўйишини тушунишарди. Лекин улар барибир актёрга кетаминни сотишди ва шу орқали вазиятдан фойдаланишди”, деди прокурор.
Ҳуқуқ-тартибот идоралари ходимлари шифокорларнинг шахсий ёзишмаларидан иқтибос келтирган, улардан бири чатда: “Қизиқ, бу аҳмоқ кейинги сафар қанча тўлар экан” ва “Келинг, билиб оламиз” деб ёзилган.
Мэттью Перри ўлимидан икки ой аввал шифокорларга тахминан 55 минг доллар тўлаган. Улар 12 долларга сотиб олган бир флакон кетамин учун актёр икки минг доллар берар эди.
Полиция мазкур иш бўйича икки кишини: гиёҳванд моддалар савдоси билан шуғулланувчи ва “кетамин маликаси” деб ном олган Жасвин Сангҳа ва шифокор Сальвадор Пласенциони ҳибсга олди. Шифокорга актёрнинг ўлимидан сўнг кетамин тарқатиш бўйича еттита айблов ва тиббий ҳужжатларни сохталаштириш бўйича иккита айблов қўйилди. Улар эса бўлиб ўтган ишларни тан олмади.
ABC News нашри маълумотларига кўра, Марк Чавес исмли яна бир шифокор ва Эрик Флеминг исмли наркотик савдоси билан шуғулланган шахслар ҳам ҳибсга олинган ва улар ўз айбини тан олган.
Изоҳ (0)