Қашқадарё вилояти Кўкдала туманида уч ёшли бола комбайн ичига тушиб кетди. Туман ҳокимлиги ҳолат юзасидан маълумот берди.
Унга кўра, 15 июнь куни Кўкдала туманида яшовчи фуқарога тегишли бўлган ғалла ўришга мослашган комбайн машинасини Х.Ғ. бошқариб фуқаро У.Б. билан унга тегишли бўлган ғалла майдонини ўриб беришга келишган.
Комбайн техник носоз бўлгани сабабли уни таъмирлаш учун У.Б.нинг уйига олиб боришган. Таъмирлаш ишлари давомида У.Б.нинг 2022 йилда туғилган фарзанди эҳтиётсизлик ва қаровсиз қолгани туфайли комбайн ичига тушиб кетган. Натижада ўнг ва чап қўлларидан жароҳат олиб, шифохонага етказилган.
Ҳозирда жабрланган бола ҳаётига жиддий хавф туғдирадиган омиллар йўқ.
Қашқадарёдаги боғчада 2 ёшли қизча назоратсиз қолгани сабаб вафот этганди.
5 июнь куни Фарғона вилояти Олтиариқ туманида уч нафар вояга етмаган бола сунъий сув ҳавзасига чўкиб кетган эди. Ҳозирда прокуратура томонидан терговга қадар текшириш ҳаракатлари олиб борилмоқда.
Май ойининг бошларида эса Тошкентнинг Бўрижар каналига тушиб кетган қизларни қутқарган эркакнинг ўзи ҳалок бўлганди. Давлат раҳбари марҳумнинг рафиқаси ва фарзандларига ҳамдардлик билдирди ва марҳум Абдуманноп Самиқов “Жасорат” медали билан мукофотланди. Мукофот унинг оила аъзоларига топширилди. Марҳумнинг турмуш ўртоғига моддий ёрдам тариқасида 50 млн сўм топширилди.
Изоҳ (0)