Аксарият машҳур инсонларнинг қайғули тажрибаси нимани англатади? На талабгирлик, на миллионлаб мухлислар салбий характер ва асоссиз хатти-ҳаракатларга чегирма бермайди. Бир кечада ҳаммасини йўқотиш ҳеч гап эмас: шоу-бизнесдаги нуфузли одамларнинг ҳамдардлиги, янги таклифлар ва ҳатто мухлисларнинг муҳаббати ҳам. Harper’s Bazaar нашри карьерасини барбод бўлишига ўзи сабабчи бўлган жаҳонга машҳур кишилар ҳақидаги мақолани тақдим этди.
Кэтрин Хэйгл
Мафтункор сариқ сочли хонимга буюк келажак ва янги «Жулия Робертс» мавқейи ваъда қилинган. Ўз вақтида унинг гўзаллиги билан ҳатто Скарлет Йоханссон ва Анжелина Жоли ҳам Кэтрин билан рақобатлаша олмади.
Кейинроқ у ҳаётда ҳам, суратга олиш майдончасида ҳам жаҳлдор, инжиқ қўпол аёл экани маълум бўлди. Бундан ташқари, у жуда хасис. У Голливуддаги энг кўп маош оладиган актрисалар қаторида бўлганида ҳам иштаҳасини жиловлашни истамади. У «Қотиллар» комедиясида иштирок этиш учун «Эҳтирос анатомияси» фильмида роль ўйнашдан бош тортди. Кино ижодкорлари эса унга 12 миллион доллар ваъда қилганди. Аммо у ерда ҳам ҳеч кимга тинчлик бермади. Айниқса, унинг партнёри Эштон Катчер кўпроқ қийналди. Натижада ҳамма Кэтрин Хайглнинг чексиз талаблари ва жирканч хатти-ҳаракатларидан чарчади. Актриса Голливуднинг қора рўйхатига кирди. Афсуски, бу ҳар қандай юлдузлик карьерасининг тугаганини англатади.
Мел Гибсон
Ажойиб актёр, режиссёр ва миллионлаб мухлислар кўнглидан жой олган Мел Гибсон бир неча йиллар аввал жуда машҳур эди. Мелнинг қаҳрамонлари ҳар доим жасур ва келишган бўлган: «Шерюрак», «Телба Макс», «Ватанпарвар» ва бошқа кўплаб севимли фильмлардаги каби. Мел Гибсон икки карра «Оскар» совриндори ва Австралия орденининг фахрий офицери унвонига сазовар бўлган. Албатта, ташқаридан қараганда бундай кучли мавқе ва обрўни йўқотиш мумкин эмасдек туйилади.
Бироқ ирқчилик ва бир қатор эҳтиётсизликлар кўплаб мухлисларни актёрдан узоқлаштирди. Шу билан бирга, Мел вақти-вақти билан шов-шувли воқеаларнинг қаҳрамонига айланди: маст ҳолатда машина бошқариш, рафиқаси Олга Григорева билан суддаги жараёнлар — буларнинг барчаси Гибсоннинг дўстлари ва мухлислари орасида обрўсига путур етказди, компаниялар у билан шартномаларни бекор қилди ва унинг шон-шуҳратидан асар ҳам қолмади.
Меган Фокс
Жуда тез машҳурликка эришиш ва бир зумда унутилиш. «Трансформерлар»нинг премьерасидан сўнг актриса барчанинг эътиборига тушди. Муваффақиятли жанговар фильмнинг иккинчи қисмида Меган ўзидан ёмон таассурот қолдирди. Шунингдек, унинг характери суратга олиш гуруҳининг ишини мураккаблаштирди. Агар у ўткир тилини қандай тийишни билса, уни кечириш мумкин эди. Миш-мишларга кўра, режиссёр Майкл Байга қилинган кескин ҳужумлар унинг карьерасини барбод қилган. Шундан сўнг франшизанинг учинчи қисмида Рози Хантингтон-Уайтли рол ўйнади. Меган Фокс эса бошқа лойиҳаларда янги ролларга муносиб кўрилмади.
Тара Рид
Ёрқин табассумли гўзал қиз «Катта Лебовски» ва «Шафқатсиз ўйинлар» фильмларида суратга тушиш билан карерасини бошлади. «Американча пирог» Тара учун ҳақиқий ғалаба эди. У деярли барча мода журналларининг муқоваларида суратга тушди. Аммо ўзидан норозилик ёки ҳаддан ташқари амбиция Тарани хавфли тажрибаларга ундади. Пластик жарроҳлик, парҳезлар ва спорт залидаги машғулотларнинг ортиши — буларнинг барчаси актрисанинг ташқи кўринишига салбий таъсир ўтказди. Бу эса мухлисларнинг ҳафсаласини пир қилди. Кўп ўтмай у «Олтин малина»га лойиқ кўрилди ва машҳурлик чўққисидан қиялаб пастга тушди. Муваффақиятсиз роллар, шахсий ҳаётдаги муаммолар унинг карьерасига путур етказди.
Жош Хартнетт
Ташқи томондан вазмин, ҳатто камтар йигитга ўхшайди. Истараси иссиқ — истеъдодига эса гап бўлиши мумкин эмас. Дастлаб суратга олиш майдончаси ва омма олдида у ўзини муносиб тутди. «Перл Харбор», «Қора қирғий» ва «Слевиннинг омадли рақами» фильмларидан кейин кўпчилик истиқболли ёш актёр билан ишлашни хоҳлади. Лекин у бирин-кетин таклифларни рад этди. Жош Брайан Сингернинг Супермени ёки Кристофер Ноланнинг Бетмен бўлиши мумкин эди. Аммо бу таклифлар уни фикридан қайтара олмади. «Мен суперқаҳрамон ролида қолиб кетишдан қўрқаман», — деб изоҳлади Хартнетт. Натижада яхши таклифлар камайиб борди ва сўнгги йилларда Жош бирорта эсда қоларли ёрқин ролни ижро этмади.
Изоҳ (0)