Қашқадарёда солиқ идораси мансабдори ва яна бир кишига жиноят иши қўзғатилди. Бу ҳақда ДХХ матбуот хизмати хабар берди.
Қамаши туманида яшовчи, 1981 йилда туғилган, муқаддам судланган шахс 360 миллион сўмлик солиқ қарздорлигини тўламагани сабабли Иқтисодий суд томонидан банкрот деб топилган ғишт ишлаб чиқарувчи МЧЖнинг солиқ қарздорлигини тўлиқ тўламасдан, заводга нисбатан қўйилган тақиқни ўзининг мансабдор танишлари орқали бекор қилдириб, унинг фаолиятини тиклаб бериш эвазига МЧЖ раҳбаридан 4000 доллар талаб қилган.
ДХХнинг Қашқадарё вилояти бўйича бошқармаси ҳамда Иқтисодий жиноятларга қарши курашиш департаменти ҳамкорлигида ўтказилган тезкор тадбирда мазкур фуқаро олдиндан 3000 доллар олган вақтида ушланган.
Шунингдек, тезкор тадбир давом эттирилиб, ушбу ноқонуний ишга алоқадор бўлган Қамаши туман солиқ инспекцияси бошлиғи ўринбосари ҳам 3000 доллар олган вақтида ашёвий далиллар билан ушланган.
Ҳозирда ҳолат юзасидан икки қонунбузарга нисбатан жиноят иши қўзғатилиб, тергов ҳаракатлари олиб борилмоқда.
5 июнь куни ДХХ Қорақалпоғистонда боғча мудиралиги учун 15 млн сўм, боғ инспекторлигига эса 3 минг доллар талаб қилган раҳбарларни қўлга олганди. 2 июнь куни Фарғонада банк масъуллари ва икки ҳоким ёрдамчисига жиноят иши қўзғатилди. Май ойининг охирларида Хоразмда Ўсимликлар карантини ва ҳимояси бўлими бошлиғи 10 минг доллар олаётганида ушланганди.
14 майдан Давлат хавфсизлик хизмати ваколатларига киритилган масалалар юзасидан жисмоний ва юридик шахсларнинг мурожаатларини тезкор равишда қабул қилиш мақсадида Call-марказ фаолият юрита бошлади. Call-марказга 1520 қисқа рақами орқали қўнғироқ қилиш мумкин. Мурожаат қилган фуқароларнинг шахси сир сақланиши кафолатланади.
Изоҳ (0)