Қашқадарёда ДХХ ва Бош прокуратура Иқтисодий жиноятларга қарши курашиш департаменти ходимлари ҳамкорлигида ўтказилган тезкор тадбирда 3 нафар адвокатнинг фирибгарлиги фош этилди.
Қарши шаҳрида фаолият олиб борувчи адвокатлик бюроси адвокати жиноят ишлари бўйича Чироқчи туман суди томонидан 2 нафар фуқарога нисбатан қўлланган қамоқ эҳтиёт чорасини суд тизимида ишловчи мансабдор танишлари орқали бошқа эҳтиёт чорасига ўзгартириб бериш эвазига 4 минг доллар олган вақтида ушланган.
Навбатдаги ҳолатда Қарши шаҳридаги адвокатлик бюроси адвокати фуқаролик ишлар бўйича Қарши туманлараро судининг иш юритувида бўлган ишни ҳуқуқий ёрдам сўраб мурожаат қилган фуқаро фойдасига ҳал қилиб бериш юзасидан у билан шартнома тузиб, хизмат ҳақи эвазига 2 миллион сўм ва давлат божи учун 1,5 миллион сўм олган. Аммо адвокат мазкур фуқаролик ишини суд тизимида ишловчи мансабдор танишлари орқали ҳал қилишини айтиб, қўшимча 500 доллар олган вақтида ушланган.
Бошқа ҳолатда эса Қарши шаҳрида фаолият юритувчи адвокатлик бюроси адвокати ҳуқуқий ёрдам сўраб мурожаат қилган фуқаро билан шартнома тузмаган ҳолда, Муборак тумани ИИБ ҳузуридаги тергов гуруҳи иш юритувида бўлган безорилик ҳуқуқбузарлигига оид ишнинг унга тегишли қисмини терговчи орқали ижобий ҳал қилиб беришни ваъда қилиб, муқаддам 2 миллион сўм олган.
Ҳуқуқни муҳофаза қилувчи органлар томонидан ўтказилган тезкор тадбирда адвокат ушбу ишни гўёки ижобий ҳал қилганини айтиб, қўшимча 2 миллион сўм олган вақтида ушланган.
Ҳозирда мазкур адвокатларга нисбатан Жиноят кодексининг 168-моддаси (фирибгарлик) 3-қисми “в” банди ва 28,211-моддаси (пора бериш) 1-қисми билан жиноят ишлари қўзғатилиб, тергов ҳаракатлари олиб борилмоқда.
Март ойида Андижон, Бухоро, Тошкент вилоятлари ва Тошкент шаҳрида адвокатлар ноқонуний пул олаётганида ушланганди. Хусусан, Андижонда адвокат стажёри ва шериги 34 минг долларни ноқонуний олаётганида қўлга тушган.18 май куни ДХХ икки нафар ички ишлар ходими катта миқдорда пора билан ушланганини маълум қилганди.
14 майдан Давлат хавфсизлик хизмати ваколатларига киритилган масалалар юзасидан жисмоний ва юридик шахсларнинг мурожаатларини тезкор равишда қабул қилиш мақсадида Call-марказ фаолият юрита бошлади. Call-марказга 1520 қисқа рақами орқали қўнғироқ қилиш мумкин. Мурожаат қилган фуқароларнинг шахси сир сақланиши кафолатланади.
Изоҳ (0)