Farg‘onada DXX va Bosh prokuratura departamenti xodimlari hamkorligida o‘tkazilgan tezkor tadbirda bank mas’ullari va hokim yordamchilari jinoyatlari fosh bo‘ldi.
Aksiyadorlik tijorat “Xalq banki”ning O‘zbekiston bank xizmatlari markazida ishlovchi mahalla bankiri mazkur markaz boshqaruvchisi o‘rinbosari bilan o‘zaro til biriktirib, 2 nafar fuqaro nomiga 66 milion so‘m kredit ajratib berish evaziga 10 million so‘m talab qilgan. Mahalla bankiri so‘ralgan pulni olgan vaqtida ashyoviy dalillar bilan ushlangan.
Tergovga qadar tekshiruv davomida, u kredit ajratib berish uchun muqaddam 600 ming so‘m, bank boshqaruvchisi o‘rinbosari esa 920 ming so‘m olgani aniqlandi.
Shuningdek, “Xalq banki” O‘zbekiston BXM mansabdor shaxslari, O‘zbekiston tumanidagi mahalla fuqarolar yig‘inlaridagi 2 nafar hokim yordamchisi va ulgurji savdoga ixtisoslashgan MCHJ rahbari soxta hujjatlar asosida boshqa fuqarolar nomiga 153 million so‘m miqdorida maqsadsiz kredit ajratilishiga erishib, ularni naqdlashtirib, talon-toroj qilgani ham ma’lum bo‘lgan
Hozirda mazkur shaxslarga nisbatan Jinoyat kodeksining 168-moddasi (firibgarlik) 3-qismi “v” bandi bilan jinoyat ishi qo‘zg‘atilib, tergov harakatlari olib borilmoqda.
Ta’kidlanishicha, BXM boshqaruvchisi o‘rinbosari 2000 va 2015-yillarda Jinoyat kodeksining 168-moddasi 1-qismi va 211-moddasi 1-qismi bilan sudlangan bo‘lsa-da, o‘z xatolaridan to‘g‘ri xulosa chiqarmagan.
May oyida kuzatilgan firibgarlik holatlari
Toshkentda 2 kishini hajga jo‘natish uchun salkam 13 ming dollar olgan turfirma xodimlari ushlandi. Xorazm va Andijonda fuqarolarga imtiyozli kredit olib berishni vaʼda qilib, pul olgan shaxslar qo‘lga tushdi. Toshkent shahar Adliya boshqarmasida aloqa operatori va Milliy gvardiyaning Qo‘riqlash boshqarmasi Qarshi shahar bo‘limi xodimiga ham firibgarlik bo‘yicha jinoyat ishi qo‘zg‘atildi. Qashqadaryoda esa 3 nafar advokatning firibgarligi fosh etildi. Xorazmda O‘simliklar karantini va himoyasi bo‘limi boshlig‘i 10 ming dollar olayotganida ushlandi.
Izoh (0)