Хоразмда пул эвазига йўл-транспорт ҳодисаси натижасида ҳеч кимга шикаст етмагани тўғрисида ҳужжатларни тайёрлаб беришни ваъда қилган шифокор ушланди, деб хабар беради Бош прокуратура ҳузуридаги департамент.
Маълум қилинишича, департаментнинг Янгиариқ туман бўлими томонидан ДХХнинг Хива шаҳар бўлими билан ҳамкорликда тезкор тадбир ўтказилган. Тадбирда Урганч ТТБ марказий поликлиникаси шифокори А.С. фуқаро Т.нинг бошқарувидаги автотранспорт воситасида содир бўлган автоҳалокат натижасида ҳеч кимга шикаст етмагани бўйича ҳужжатларни унинг фойдасига ҳал қилиб беришни ваъда қилгани аниқланган. Шунингдек, у ҳайдовчига текширув ҳаракатларини ўтказаётган ИИБ терговчисини жавобгарликка тортмасликка кўндириб беришини айтган. Бунинг эвазига шифокор 1000 доллар олган вақтида ашёвий далиллар билан ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Аввалроқ Бухорода тадбиркорнинг ноқонуний фаолият юритишига рухсат бериш эвазига ундан ойига 500 минг сўмдан пул ундириб келган солиқчи қўлга олингани, Чироқчи туман ЙҲХБ бошлиғи 130 минг сўм пора билан ушлангани, Самарқандда 50 минг доллар эвазига ДХХга ишга киритиб қўймоқчи бўлган шахс қўлга олингани тўғрисида хабар берилганди.
Изоҳ (0)